Helgrindur í heljargreypum

Kambur í bakgrunni

Alls gengu 33 Toppfarar á Helgrindur laugardaginn 27. ágúst í blíðskaparveðri til að byrja með
en þoku og rigningarúða uppi í fjöllunum. Gengið var um grýttar slóðir í fjallasal sem skartar freistandi tindum á alla vegu en á efsta tindi lét útsýnið á sér standa... þar austar á brúnunum að Grundarfjörður og Kirkjufell blöstu skyndilega við gegnum þokuslæðinginn á þessum magnaða útsýnisstað.

Eins og þessum hópi einum er lagið tókst honum að fara eins grýtta leið og hægt var til baka með brölti um klettabelti og rima innan um tröllvaxin björg sem furðuðu sig á þessu brölti göngumanna á torfærri slóð með greiðfærari dalinn í göngufæri rétt hjá... ;-)

Lagt var af stað frá bænum Kálfárvöllum í boði ábúendanna Bjarna og Sigrúnar
sem alltaf hafa reynst okkur vel þegar til þeirra hefur verið leitað með leyfi til uppgöngu frá bænum.

Erfiðasti hjallinn á leiðinni á Helgrindur er fyrsta brekkan upp á hálendið ofan bæjarins...

Að sjálfsögðu völdum við erfiðustu leiðina af þeim sem í boði voru í brekkunni... milli giljanna með fossana á báða vegu... af því að það var fallegasta leiðin... og léttast að fara erfiðustu leiðina í krafti hópsins...

Fyrsta brúnin á leiðinni... veðrið var svo gott að við vorum í letikasti og tókum góðar pásum þennan dag í blíðviðrinu...

Kambur... tindóttur hryggur austan við gönguleiðina á Helgrindur í fjarska... afskaplega freistandi leið til að klöngrast um í framtíðinni...

Veðrið var yndislegt... lygnt, hlýtt og háskýjað...
Það átti hins vegar eftir að breystast eilítið eftir því sem ofar dró á fjallgarðinn...
en lognið og hitinn hélt sér að mestu... það kom bara einhvur rigningarþvæla þarna inn frá...

Útsýnið niður til Kálfárvalla... sjá má bílaflota hópsins hægra megin nær Kálfá.

Ofan af brúnunum tók við gullfallegt landslagið á fjallgarðinum með fossaröðum á beggja bóga og smám saman risu tindarnir á vestanverðu Snæfellsnesi allt um kring en jökullinn sjálfur var þó hálfur í skýjunum allan þennan dag... aldrei þessu vant á okkar göngu um þetta svæði...

Inn með Kálfárdal gengum við grasi vaxna slóð gegnum mosa, sprænur, berjalyng og stöku steinahrúgur...

Axlarhyrna, Stapafell og hluti af Mælifelli...

Axlarhyrna er komin á vetrargönguverkefnalistann... ekki hátt fjall en fagurt, vel staðsett og sögulegt þar sem sjálfur Axlarbjörn er frá bænum Öxl við fjallsræturnar... það gæti vel veri´ við hæfi að ganga á Axlarhyrnu og fara í leikhús á eftir árið 2012 þar sem Axlarbjörn er nú á fjölunum á Snæfellsnesi og brátt í Borgarleikhúsinu...

Toppfarar skarta öðlingum sem eiga fá sína líka og varðveitast vonandi um ókomna tíð í klúbbnum...
...Ingi, Súsanna, Steinunn, Irma, Ósk og Björn...

... og grallara sem gantast sama hvað á gengur og taka sig aldrei of hátíðlega...
Hanna, Brynja, Steinunn, Stefán Alfreðs, Kjartan
og aftar eru Björn, Thomas, og Ingi

Á fjallgarðinum sunnan Helgrinda eru nafnlausar tjarnir sem fengu ýmis nöfn eftir því hver gekk framhjá hverju sinni...
Kambsvatn var eina nafnið á svæðinu en það vatn var í hvarfi bak við hól í austri...

Stakkfell hinum megin vatnsins... við sáum góða uppgönguleið á það fyrir næstu ferð...

Smám saman læddist þokan inn eftir því sem ofar dró...
ambur í fjarska með vötnin spegilslétt nær sem lýsir veðrinu vel þennan dag...

Jú, rigningarúðinn þéttist svo vert var að fara í skelina...

Við tóku tröllsleg björgin upp á fjallgarðinn sem hýsiðr sjálfar grindurnar heljar
sem hvína í verstu veðrum svo vel heyrist niður í hús í Grundarfirði...

Í þetta sinn fórum við upp á rimann sjálfan og þræddum okkur eftir honum á hæstu kúlur Helgrinda...

Uppi í klettunum lágu aldraðir snjóskaflar sem lifa af sumar eftir sumar og endurfæðast á hverjum vetri...

Það er sísnævi á Helgrindum sem þó ná ekki 1000 m hæð... hvílíkt veðravíti sem þetta er þá...

Þetta var fínasta leið upp á hæsta tind...
Skyndilega vorum við komin að Rauðkúlu fyrir ofan okkur og Böðvarskúlu í seilingarfjarlægð í þokunni...

Skarðið fagra milli Böðvarskúlu og Rauðkúlu...

Uss... ekkert skyggni... synd... á jafn fallegum útsýnisstað... minnti mann á vonbrigðin á Kaldbak á Vestfjörðum í fyrrasumar...
staður þar sem magnað er að standa og horfa á óendaneika landslagsins allt um kring... en við förum bara aftur síðar...

Klettaklöngur var greinilega verkefni þessa dags...

Nesti í skarðinu... þar var nokkuð lygnt þó rigningin stæði enn yfir
og engan veginn hægt að vera viss um að veðrið yrði fljótlega betra þó haldið yrði niður á við úr þessu...

Flestir á því að halda bara niður sömu leið og sleppa aukakrókum í bakaleiðinni úr því ekki viðraði betur en þetta...
Vð tókum þó Rauðkúlu og ákváðum þar að halda með hryggnum eitthvað áleiðis þar sem veðrið var gott þó þoka væri yfir öllu...

Það reyndist rétt ákvörðun því leiðin var skemmtileg þó þokan grúfði yfir öllu...

... og enn fegnari vorum við yfir þessu leiðarvali þegar snúið var upp á brúnirnar aftur þegar aðeins létti til...

... og við sáum skyndilega niður brúnirnar til Grundarfjarðar og að Kirkjufellinu sem rís óborganlega fallegt beint úr sænum...

Magnað landslag á því sem við héldum að héti Tröllkerling...

...en á mapsource er hún enn austar... og þetta því nafnlausir tindar Helgrinda...

Myljandi fallegt umhverfi sem gott var að njóta í logni og hlýju með sólina að berjast gegnum þokuna...

Þessir klettar kölluðu á hópmynd úr því ekkert var útsýnið til að skarta hana með...

Gylfi Þór, Jón Atli, Einar Sig., Kjartan, Steini P., Lilja Sesselja, Guðrún Helga, Steinunn, Stefán A., Hjölli, Sigga Rósa, Katrín Kj., Hanna, Súsanna, Elsa Inga, Ágúst, Heiðrún, Ósk, Ingi, Ásta Bjarney (neðar), Gerður Jens., Sjoi, Brynja, Björn, Thomas, Hermann, Irma, Arnar, Örn, Jóhann, Hugrún, Rósa og Bára tók mynd... með Kol einhvers staðar þarna svartan eins og hraunið...

Skyndilega opnaðist enn betur fyrir útsýnið niður að sjó í suðri yfir gönguleiðina fyrr um daginn...

... og sama gerðist í norðri niður með suðurhlíðum Helgrinda og Kirkjufellið dáleiddi okkur aftur...

Fjall sem fátt skákar í glæsileik þrátt fyrir lága hæðartölu...
sSo þétt uppgönguleið að hópur eins og Toppfarar gæti ekki gengið á það nema í hollum heilan dag... ;-)

Hey, tökum hópmynd með Kirkjufellið í baksýn... nei, æj, það er farið aftur bak við þokuna...
en þessi náðust á mynd... hlæjandi að þjálfaranum að komast að því að hann gæti hvort sem er ekki náð hópmynd þarna af öllum
yrir plássleysi...

Niður var þá loks haldið eftir ævintýralega ferð meðfram brúnum Helgrinda ofan Kirkjufells...
með ekki síður glæsilega tinda til austurs að Tröllafjölskyldunni sem við heimsækjum síðar...

Útsýnið til suðurs niður að Stakkfelli... eða Stakfelli eins og einhvers staðar má sjá á korti...
betra nafn... svo stakt í landslaginu þarna...

Hér fór að greiðast mikið úr hópnum en allir sameinaðir í skarðinu þarna ofan skaflsins úr því þokan var enn við lýði...

Þaðan sem mesta klöngur dagsins beið okkar...
Við hefðum getað klöngrast lengra til hægri, vestar, til að losna við þessa bröttu kletta sem þarna tóku við...

...en þetta var fært og þá um leið hollt fyrir alla sem vilja fara leiðir sem þeir annars færu ekki einir eða fáir á ferð...
Til hvers að vera í fjallgönguklúbbi árum saman ef maður fer ekki ótroðnar slóðir og erfiðari en venjan er ?

Þetta tók hins vegar sinn tíma...

Sðustu menn létu þetta hvergi slá sig út af laginu og tóku þetta á brjáluðum  hlátrasköllum alla leið...

Við tók grýtt leið niður að vötnunum og lungamjúkt grasið meðfram Kambi þar sem þó leyndust ótrúlegustu klöngurkaflar sem töfðu för...

Hér skildi á milli fyrstu og síðustu manna þar sem Örn hélt áfram með fremri hóp til að tefja ekki meira fyrir með þá öftustu í fylgt Báru...

Yndislegt að koma niður í gróskuna eftir gróðurvanar slóðirnar uppi á hrjóstrugu hálendinu...

Fyrsta brekkan sem um leið varð þá sú síðasta þennan dag... var tekin af flestum gegnum gilið austast
sem er mest aflíðandi en um leiða ansi grýtt... 
Öruggasta leiðin líklega að vetri til...

Á meðan leiðin austan við bæði gilin er líklega best að sumri til þar sem hún er grasi grónust þó brött sé efst.

Útsýnið niður af síðustu brekkunni til bílaflotans og bæjarins með Kálfá á hægri hönd...

Fyrstu menn skiluðu sér í bíla eftir um 7:40 klst. göngu og þeir síðustu 8:44 klst.
en allir fengu hlýjar móttökur...

Við gengum alls 13,8 km upp í 999 m hæð með 1.057 m hækkun miðað við 46 m upphafshæð og vorum...

Bergnumin og grjóthörð
...eftir krefjandi göngu á þessum dulúðugum Hringadróttinsslóðum...

Næst förum við baksviðs (backstage) á Helgrindur og göngum á Kamb, Stakkfell og Tröllafjölskylduna alla...
eins og við gerðum í magnaðri sex tinda göngunni í Tindfjallajökli haustið 2010...

... og næst auðvitað á hæsta tind Helgrinda frá Grundarfirði... eða hvað er það annars langur akstur... ? ;-)

Alla myndir þjálfara hér:https://picasaweb.google.com/Toppfarar/T63Helgrindur270811

... og frábærar myndir félaganna á fésbókinni...