Með tungli og sól á nýársgöngu

Töfrar vetrarfjallamennsku eins og þeir gerast tærastir

Fyrsta ganga ársins 2010 var farin laugardaginn 2. janúar og var þátttökumet enn slegið í tindferð þar sem 44 félagar mættu og nutu fegurðar vetrarins í mesta skammdeginu með bæði tungl og sól á himni...

Gengið var á Hádegishyrnu og Mórauðahnúk á austanverðri Skarðsheiði með kristaltærri sýn á Skessuhorn og tinda Skarðsheiðar og fjöllin allt um kring í vestri, austri, norðri og suðri.

Veðrið var með besta móti, Heiðskírt, NA 2 m/s og -5 til -11 °C.

Ein fegursta gangan í sögu klúbbsins... enn einu sinni...

...sem segir manni bara eitt;... fjallamennskan býður upp á ótakmarkað marga fagra göngudaga sem ekki skyggja hver á annan heldur bæta enn einum dýrgrip í fjársjóð fjallgöngumannsins í hvert sinn sem hann leggur í hann...

-------------------------

Lagt var að stað úr bænum kl. 7:00... daginn eftir nýársdag... jebb, svona er lífið þegar maður er á fjöllum allt árið...

Og lagt í hann gangandi frá Draganum kl. 8:28 í næturmyrkrinu en með nánast fullt tungl á himni
og snjóinn yfir öllu svo höfuðljósin voru nánast óþörf.

Sjá ísilagðan lækinn sem gengið er yfir á mynd.

Tunglið vísaði veginn upp austurhlíðar Hádegishyrnu þar sem gengið var meðfram brúnum Villingadals
sem smám saman kom í ljós með dagsbirtunni.

Ingi fræddi okkur reglulega um hitastigið, vindkælinguna og vindmetra á sekúndu
með glænýju tæki sem hann vígði í göngunni.

Toppfarar og tunglið... félagar á fjöllum...

Færið var mjög gott, brakandi þunnt lag af snjó yfir öllu og hvergi hálka nema við vatnsföll, læki og mýrar.

Hálkugorma-áherzla þjálfara má sín lítils þegar dagarnir eru alltaf svona góðir en allur varinn er góður þar sem maður vill bara lenda einu sinni í því að komast hvorki lönd né strönd fyrir hálku...

Austurhlíðar Hádegishyrnu eru ótrúlega drjúgar en þegar náð var tæplega 900 m hæð vorum við komin upp á heiðina og stutt í tindinn við brúnirnar í vestri. Mjög grýtt landslag sem mildaðist í snjónum.

Tunglið enn með í för.. það skilaði okkur alla leið...

...og var eins og eitt af göngumönnunum í röðinni frá sjónarhóli þjálfarans sem rak lestina...

Að baki var sólin að koma upp...

...með Akrafjall, Esjuna, Móskarðahnúka, Búrfell á Þingvöllum, Hvalfell, Eyjafjallajökul, Botnssúlur, Hvalfell, Heklu, Kálfstinda, Klukkutinda, Tindaskaga, Kvígindisfell, Skjaldbreiður, Skriðutind, Hlöðufell, Stóra Björnsfell, Þórisjökul, Geitlandsjökul, Langjökul, Ok, Eiríksjökul og Strút... í roðanum í suðri og austri...

Eyjafjallajökull var eina fjallið sem stóð í okkur og fékk á sig kenningar eins og Lyngdalsheiði og Þríhyrning...
en sást betur þegar ofar dró og fjarlægðin varð skýrari og einhver skarpur sá konung fjalla á Suðurlandi...

Fjórir jöklar hvorki meira né minna...

Skyndilega reis Skessuhornið í vestri...

Og við máttum vart mæla fyrir þeirri tignarlegu sýn sem greip okkur á brúninni... hrikalegri tind er erfitt að finna á Suðvesturhorninu sjónrænt séð og Skessuhornsförum varð á orði... "hvað vorum við eiginlega að gera þarna í mars í fyrra?...

Þarna var golan nöpur og fljót að kæla menn niður svo afráðið var að leita skjóls í suðurbrúnum niður að Grjótárdal með hrygginn vestur að Lambatunguhnúk neðar... freistandi að halda áfram en þessi leið bíður okkar síðar... hugsanlega í nýársgöngu 2011? þar sem gaman væri að ganga upp Kambshornið á hrygginn og vestur á Skarðskamb... með sólargeislana þá skínandi á okkur allan daginn ólíkt skugganum sem við vorum í þennan dag.

Gengið að nestisstaðnum... Akrafjall og brúnir Miðfjalls í Skarðsheiði til suðurs nær.

Nestið var meira og minna frosið... þjálfari minnist þess ekki að hafa áður bitið í samloku og fengið nístandi tannkul við hvern bita... en kakóið gerði allt gott og klesst samloka með heitu kakói var góður og gamalkunnur biti eftir nýlokin veisluhöld hátíðanna...

Sólin tók sína fyrstu geisla á okkur í matnum og litirnir einstakir á þessum árstíma
þegar gengið er í samfelldu sólarlagi frá upprás til sólarlags...

Köld en nærð var gengið af stað aftur með brúnum Hádegishyrnu.

Ásta, ástríðuljósmyndari hér í félagsskap Skessuhorns í fjarska.

Tungið að setjast í vestri yfir Snæfellsjökli og fjallgarði Snæfellsness með rauðgula sólargeislana á snjónum nær...
ólýsanleg fegurð sem ljósmyndirnar ná engan veginn að fanga nægilega...

Fjallasýnin í austri...

Ok, Langjökull-Geitlandsjökull, Þórisjökull, Stóra-Björnsfell, Hlöðufell, Skjaldbreiður, Skriðutindur og Kvígindisfell á mynd.

Brúnir Mórauðahnúks sem tekur við af Skarðshyrnu í norðri... sjá kortið "Skarðsheiðarhringur" sem gefið var út af sveitarfélögunum á svæðinu í haust og Ingi dreifði á klúbbfélaga ásamt korti af Hvalfirði.

Fjörutíuogfjórir Skarðsheiðarfarar...

Efri: Bára, Ásta H., Kári Rúnar, Petrína, Hlynur, Lilja K., Ketill, Anton, Rikki, María, Hjölli, Óskar Úlfar, Heiðrún, Birna, Guðmundur Baldur, Jóhannes Svavar, Anna Elín, Þorsteinn, Inga Lilja, Lilja B., Ingi, Eyjólfur, Áslaug, Ingvar Páll, Snædís, Björgvin J., Sigrún, Leifur, Halldór og Kristinn.
Neðri: Kristín Gunda, Harpa, Sigga Rósa, Elsa Þ., Guðjón Pétur, Gerður, Roar, Helga Bj., Sigga Sig., Hildur Vals., Rósa, Heimir og Björn fremstur á mynd og Örn tók mynd.

Þar af var Hlynur hennar Petrínu að mæta á sína fyrstu göngu og sást lítið aftast...

Og fjallaskutlan hún Dimma var líka með.

Skessuhornsfarar með Skessuhorn í baksýn.

Roar, Þorsteinn, Guðjón Pétur, örn.
Sigga Rósa, Sigga Sig. og Bára.

Faðmlag utan um Siggu sem sýnt hefur fádæma hetjulund og styrk frá hinum örlagaríka degi í fyrra.

Á mynd vantar Gylfa Þór, Simma, Soffíu Rósu og Stefán Heimi sem ekki voru í göngu dagsins.

Mórauðihnúkur var jafn aflíðandi og Hádegishyrna...

Og útsýnið nú til norðurs m. a. að Baulu og Tröllakirkju á Holtavörðuheiði og vestur á fjallgarð Snæfellsness í vestri og Hafnarfjalli við Skarðsheiðina og svo Skorradalsvatni nær í norðri.

Norðurhlíðar Skarðsheiðarinnar með Skessuhorn fjærst...

Sólin virtist varla rísa til að skína á okkur enda sólarupprás kl. 11:21 og sólsetur 15:38...
Sólargangur færist til um 1 mínútu á dag að morgni og tvær mínútur á dag að kveldi þessa dagana
en mun auka hraðann þegar nær dregur voru.

Gengið var alla leið að norðurbrún Mórauðahnúks áður en snúið var yfir á brúnirnar við Villingadal.

Harpa, Eyjólfur, Björgvin Jóns og Elsa Þóris.

Gengið að brúnunum við Villingadal þar sem við sáum brúnirna sem gengnar voru í myrkrinu um morguninn.

Tindur Toppfara í febrúar... Strútur í fjarska við Eiríksjökul sem er tindurinn í apríl...

Gengið niður Mórauðahnúk sem merkur er hæstur 810 m á Skarðsheiðarkortinu en þarna er hæðin lægri og hæsti punktur mun nær Hádegishyrnu sem þýðir að kortið er ekki með öllu rétt ef maður horfr á merkta staðsetningu og hæðartölu á kortinu, enda er svona vinna sífellt í endurskoðun. Við ákváðum að láta hæsta punkt ráða þar sem segja má að farið sé niður af Hádegishyrnu ofar - sjá kort neðar - en eins mætti segja að þessi tangi sé Mórauðihnúkur og þá þyrfti hann að skilgreinast lægri eða um
500 m.mi

Mórauðihnúkur var drjúgur eins og Hádegishyrna en útsýnið í allt aðrar áttir
sem gerði gönguna fjölbreytta og víðsýna í þessu tæra og fallega veðri..

Litið til baka upp á Mórauðahnúk í skugganum...

Synd að hafa sólina ekki hærra á lofti en um leið var þetta tær snilld og ekki hægt að kvarta.

"Erfiðasta" yfirferð dagsins... smá brekkur niður af Mórauðahnúk sem voru vel færar.

Þarna var grýttast og seinfarið um hált lausagrjótið.

Gljúfrin svo neðar sem eru hvert öðru fallegri og leyna á sér þar til komið er nær
og eins er skógurinn og kjarrið ilmandi og blómstrandi náttúrufegurð að sumri til.

Heiðrún, Heimir og Hjölli  með Skorradalsvatn í baksýn sem var ísilagt eftir frosthörkur síðustu daga
og sprungið þvers og kruss sem gaf því magnað yfirbragð.

Komið niður í Villingadal með fossa Villingadalsár ofan af Skarðsheiðinni...
...helfrosnir og helbláir en gullfallegir.

Sigga Rósa, Kristín Gunda, Heiðrún, Björn og Ingi.

Gengið var að stærsta gljúfrinu þar sem frosnir lækir runnu niður um allt... nei við ætluðum ekki þarna niður... bara skoða...

Óskar Úlfar, Guðmundur Baldur, Harpa, Hjölli, Rósa og Anton.

Gengið meðfram gljúfrinu um Villingadal í austur í leit að góðum stað til þverunar.

Gljúfrin sameinast á einum kafla svo krækja þurfti fyrir þau og þvera einn af mörgum ísilögðum lækjum
sem á vegi okkar urðu þennan dag.

Kjarrið tók við og maður fann ilminn af birkinu í hjartanu ...

Góð leið fannst niður í gljúfrið þar sem ísilögð Villingadalsá rann í klakahröngli.

Jú, enn líf í henni undir ísnum og hefði verið auðvelt að leika sér þarna lengi með myndavélina
ef meirihluti hópsins hefði ekki viljað halda áfram að bílunum... skrítnir þessir fjallgöngumenn... geta ekki hætt að ganga :-)

Grasið tók við og gamall vegaslóði að bílunum meðfram Dragaá sem bauð upp á ísilagða fossa á leiðinni...

Síðasti tónn ferðarinnar var þar með sleginn...

Klingjandi kristaltær ganga á mörkum dags og nætur

Flottari dag á fjöllum í svartasta skammdeginu er ekki hægt að hugsa sér.

Gangan mældist 14,5 km á 6:10 - 6:20 klst. upp í 973 m hæð (Hádegishyrna) og 819 m hæð (Mórauðihnúkur)
með 754 m hækkun miðað við 219 m upphafshæð.

Komin í bæinn um kl. 16:00 eftir sólsetur í rökkri.

Gps-prófíllinn með hæsta punkt 973 m.

Gps-slóðinn í afstöðu við nágrennið (vítt sjónarhorn).

Google Earth loftmyndin með Skessuhornsgöngunni frá því í 28. mars 2009 sem fylgir okkur um ókomna tíð...
(aukatrack af göngu þjálfara fyrr í mars hægri slóðinn á myndinni)

Við eigum nú eingöngu eftir að ganga um miðhluta Skarðsheiðarinnar... búin með vestur- norður- og austurhlutann...
(önnur ganga á Skessuhorn alla leið reyndar eftir - ágúst 2011 í bígerð)

Árið 2010 hefst með tærri snilld sem gefur auðvitað tóninn fyrir framtíðina...
ólýsanlega fagra göngudaga á fjöllum...
og framandi tinda í safnið...
með frábæru fólki!
 

Við erum á toppnum... hvar ert þú?
www.toppfarar.is

Toppfarar ehf - Viðarrima 52 - 112 Reykjavík - Kt: 581007-2210 - Sími: +354-867-4000 / -899-8185 / -588-5277 - Netfang: bara(hjá)toppfarar.is
Copyright: Höfundarréttur: Bára Agnes Ketilsdóttir