Fjallafjársjóður
á Hóls- og Tröllatindum

Alpafílingur á göngu um leyndardóma Snæfellsness

Stórkostleg tindferð og ein sú fegursta í sögu Toppfara er að baki laugardaginn 7. nóvember þegar 37 Toppfarar gengu á Hóls- og Tröllatinda á Snæfellsnesi í blíðskaparveðri allan tímann og mögnuðu útsýni.

Útsýnið, veðrið og fjallasýnin var með ólíkindum gott þennan dag og engan veginn hægt að lýsa þeirri dýrð með myndum
sem sýna eingöngu brotabrot af þeirri veislu sem fyrir borð okkar var borið þennan dag.

Hvílík fegurð !

Lagt var af stað úr bænum kl. 7:00 og komið við í Borgarnesi... en þar töfðumt við um óþarfa auka 30 mín vegna hörguls á salernum... og lærðum þá lexíu að fara ekki í N1 við Hyrnuna næst svona snemma dags, heldur Shell bensínstöðina þar sem þó eru tvö wc en ekki eitt (og auðvitað dreifa okkur á báða staði). Það var engin leið að fá starfsmann N1 til að hleypa tæplega 40 manns á stóru wc-in og því tók það hópinn 38 mín að taka "stutt wc-stopp" í Borgarnesi...

Veðurblíðan þennan dag var með ólíkindum... logn og léttskýjað, heiðskírt í vestri, skýjaðra í austri... SV1, 4°C, sólin að koma upp og fjöllin á Snæfellsnesi glitruðu út um bílgluggann á leiðinni vestur nesið með jökulinn tindrandi í fjarska.

Við vorum þegar komin með fleiri fjöll á biðlistann við aksturinn...

Lagt var af stað gangandi frá malarvegi við fjallsrætur Hólsfjalls í suðvestri.

Brekkan upp hlíðar þess voru mosavaxnar og skriðurunnar og farnar í rólegheitunum í brattanum...

Mönnum varð fljótt heitt í hamsi í sumarblíðkuðu nóvemberveðrinu.

Á brún Hólsfjalls í 408 m hæð við Leysingjahamnar eftir 364 m hækkun tók við magnaður fjallasalur Tröllatinda og Elliðatinda
og við tókum andann á lofti...

Elliðatindar í baksýn... þeir eru komnir á dagskrá í október 2011...

Hóls- og Tröllatindar í fjarska: Hólstindur lengst til vinstri, tindur tvö þar við hliðina - Tröllatindur? - og Tröllatindahryggurinn sjálfur samfelldur frá miðju og til hægri.

Við stefndum hins vegar ekki beint á tindana heldur yfir á vesturbrúnir Hólsfjalls þar sem skemmtileg klettaborg beið okkar til klöngurs - Hólshamar - þar sem ætlunin var að njóta útsýnisins til vesturs út nesið og fara svo dalinn beinustu leið í bakaleiðinni.

Hólshamar...

Frá brún Hólsfjalls að brún hamarins greiddist mikið úr hópnum eftir gönguhraða og því sáu síðustu menn þá fyrstu tróna á toppi Hólshamarsins með Hólstind hægra megin á mynd og Tröllatind lengst til hægri.

Birna, Heiðrún og Ingi klöngrast hér framhjá Hólshamri með útsýnið til suðausturs að meginlandi Borgarfjarðar.

Auðvitað fóru menn upp á hamarinn og þar voru teknar myndir m. a. stelpumynd (sjá fésbókina).

Útsýnið í algleymi þarna uppi...

Vesturbrúnir Hólsfjalls voru því næst þræddar með ólýsanlega fjallasýn til vesturs að fjallgarðinum og Snæfellsjökli.

Eitt magnaðasta útsýnissvæði í sögu klúbbsins var tekið að birtast okkur þennan dag...

Steinunn, Birna, Halldóra Þórarins og Ásta Henriks hér komnar í ísilagðar melarnar
með suðurströnd Staðarsveitar í baksýn.

Við rætur Hólstinds var farið í gormana... framundan voru þéttar brekkurnar upp á tindinn í hrímuðu grjótinu sem var orðið hált viðkomu.

Tindar Gráborgar í baksýn (sjá vangaveltur um nafngiftir síðar í frásögninni)...

...og sjá tunglið á himni hálf fullt sem fylgdi okkur vingjarnlega þennan dag ásamt sólinni...

Útsýnið sést ágætlega hér frá "gormastaðnum" með Snæfellsjökulinn rísandi eins og dáleiðandi afl í landslaginu.

Ísilagðir klettar Hólstinds tóku við...

Gangan sóttist vel og voru hvergi tæpistigur né óþægilegt um að fara.

Snædís, Anton, Hjölli og Sigga Sig.

Við vorum skælbrosandi á uppgöngunni...

...hugfangin fegurðinni sem þessi staður bauð okkur upp á.

Svarthamar og Þorgeirsfell í baksýn með Hrafntinnuborg fyrir miðju að ógleymdum kóngi Snæfellsness
og Ástu H. að sýsla við myndavélina síðustu brekkuna.

Á tindinn komum við í nánast logni með óskert útsýnið til allra átta en þó skýjaslæður í austri sem virtust ætla að ógna okkar tæru sýn en komu samt aldrei yfir og héldu sig við Ljósufjöll.

Anton "toppaði" auðvitað almennilega og myndavélarnar voru á lofti áður en nestið tók við.

Útsýnið til vesturs af Hólstindi...

Okkur fannst við koma auga á Helgrindur og Böðvarskúlu í mörgum tilraunum með Kirkjufellið úti á hafi til viðmiðunar...
og tókst loksins að við höldum að átta okkur á tindunum þeim...

Og sýnin til austsuðausturs að Elliðatindum og skýjuðum austurhluta nessins.

Hláturinn var aldrei langt undan frekar en vanalega... Anna Elín, Örn og Þorsteinn...

Birna að borða og Nanna að sýsla eitthvað í nestinu.

Sjá slóð þjálfara af uppgöngu á Hólstind á YouTube:

http://www.youtube.com/watch?v=-_N6vpXmOk0

Hóls- og Tröllatindafarar:

Halldóra Kristín, Brynja, Steinunn, Ágústa, Snædís, Sigga Sig., Hildur Vals., Hjölli, Heiðrún, Þorsteinn, Gerður, Ketill, Óskar Bjarki, Ingi, Lilja Sesselja, Rósa, Jóhannes R., Áslaug, Inga, tíkin Día, Anna Elín, Örn, Valgerður, Helga Björns., Elsa Þ., Óskar Úlfar, Sigrún, Harpa, Kalli, Gnýr, Hermann, Birna, Gylfi Þór, Anton, Ásta H., Nanna B., Kári Rúnar og Bára.

Nokkrir félagar komust ekki í þessa ferð og voru með hugann hjá okkur og sendu jafnvel sms eins og Sigga Rósa sem stödd var á Snæfellsnesinu í öðrum erindagjörðum... og Guðjón Pétur sem nánast aldrei lætur tind framhjá sér fara og var upptekinn þennan dag, fékk það óþvegið hjá félögunum sem hringdu hver á eftir öðrum í hann til að láta hann vita af góða veðrinu á tindinum...

Af hæsta tindi var afráðið að ganga yfir á næsta tind - Tröllatind sem kalla má svo í norðaustri - og svo yfir á Tröllatindahrygginn.

Hvað heita þessir tindar annars?

Ekkert lesefni fannst af göngum á Hóls- og Tröllatinda á veraldarvefnum né við snögga leit í bókum og því voru þjálfarar tvístígandi fyir því hvað kalla má Tröllatinda. Á sumum kortum eru allir tindarnir klárlega nefndir Tröllatindar 930 m og punkturinn yfir fjöllin yfirleitt þar sem tindur tvö er eða þar sem hryggurinn er, á einu korti er hálendi beggja fyrstu tindanna sem eru hæstir merkt Gráborg, en á öðrum kortum er Hólstindur nefndur sér og þá sá vestasti.  Hann er merktur 930 m og mældur 939 m hjá okkur þennan dag, en sá við hliðina (tindur tvö hjá okkur) mældist svipaður eða 1 m lægri/hærri hið mesta.

Tröllatindar eru sagðir 930 m og á kortum má ætla að tindur tvö og hryggurinn sjálfur séu hinir eiginlegu Tröllatindar með eða án Hólstinds.

Sjá Árbók FÍ frá 1986 um "Snæfellsnes norðan fjalla" - bls. 72 (og sjá myndalýsingu á bls. 71): 

"Annars má segja að þarna sé hin mesta tröllabyggð, því yfir gnæfa Tröllatindar á háfjallinu. Þar eru nokkrir drangar sem trúlega eru tröll þau, sem tindarnir draga nafn af, en einn drangurinn er þó miklu mestur. Hann rís vestast í tindaröðinni og ber við himinn ferlegur að sjá neðan úr Eyrarbotni". Þessi lýsing virðist eiga við Hólstind en gæti átt við tind nr. tvö eða "Tröllatind" skv. okkar nafngift en allavega má vera ljóst að skv. þessu getum við verið viss um að hafa gengið á Tröllatinda með bröltinu á fyrstu tvo tindana.

Þá má lesa í Árbók FÍ frá 1982 um "Snæfellsnes frá Löngufjörum að Ólafsvíkurenni" - bls. 43:

"Vestur af kinnunum uppi á fjallinu eru Kjóamýrar, en norður af þeim rísa Hólstindur (930 m) og Tröllatindar. Eru tindar þessir með þeim hæstu á fjallgarðinum og af þeim er víðsýnt mjög í björtu veðri".

Einnig skal nefnt að í bókinni og á netinu má sjá að við lýsingar á ljósmyndum af Tröllatindum þá eru þeir allir nefndir Tröllatindar og því litið á þá sem eina heild og jafnvel hugsanlegt að Hólstindur sé aukanafn á vestasta Tröllatindinum.

Niðurstaða okkar er sú að við gengum á Hólstind fyrst (sem hæsta tind Hólsfjalls) og svo á Tröllatinda með því að ganga á þann hæsta þeirra fyrst, tind tvö - nefnum hann hér Tröllatind - og svo yfir á  Tröllatindahrygginn sjálfan sem við enduðum á.

ATH! Hér kemur viðbót við ofangreindan texta þann 30. nóvember 2009:
Þjálfurum áskotnaðist að fá lánað kortasafn sem gefið er út af heimamanninum Reyni Ingibjartssyni og styrkt af VÍS og heitir "Snæfellsnes 4 kort" eða Snæfellsnes eins og það leggur sig, með þremur stórum kortum (Kringum Snæfellsjökul, Mið-Snæfellsnes og Inn-Snæfellsnes) og einu leiða- og þjónustukorti. Þar kemur fram á "Mið-Snæfellsnes-kortinu" að Hólstindur er merktur sér (reyndar 950 m sem er of hátt sýnist okkur) og Tröllatindar merktir sem tindur tvö og hryggurinn saman og þá 930 m þar sem hann er hæstur. Klettariminn hrikalegi sem liggur út frá Hólstindi er svo nefndur Gráborg svo ályktanir okkar hér að ofan út frá öðrum kortum er í algjöru samræmi við þetta, þ.e. við gengum á Hólstind sem fyrsta tind og svo á Tröllatinda með tindi tvö og þrjú og horfðum á klettaborgina Gráborg frá tindunum. Mælum með þessu kortasafni, nákvæmt, vel unnið og góðar upplýsingar á því eins og Skarðsheiðarkortið og Hvalfjarðarkortið sem dreift var til kúbbmeðlima í haust en það er líka unnið af heimamönnum.

En... nóg um nöfn...

Það er landslagið og gæði þess sem gildir sama hvað það heitir nú...
þó þessi tilhneiging sé óskaplega sterk hjá manni að vilja alltaf vita hvað landið heitir...
til þess að gefa hlutunum meiri merkingu... en við förum nú ekki út í merkingarfræði hér...

Af Hólstindi gengum við galvösk niður brekkurnar yfir á Tröllatind í veðurblíðunni
með suðurströnd Staðarsveitar ljómandi í hádegissólinni.

Á þessum tímapunkti vorum endanlega gefin á vald vetrarveraldar þessara tinda
og engin leið að lýsa tilfinningunum sem hrærðust um mann á þessari gönguleið...

Fegurðin var jafn dáleiðandi í stærð sinni um fjallgarðinn allan í báðar áttir
sem og í smæð sinni með glitrandi frostdropana á grjótinu...

Sjá má smæðina m. a. í gullfallegum myndum Ástu Henriks í fésbókinni.

Gengið á Tröllatind eða hæsta tind Tröllatinda sem er vestastur... með frostbitna klettana í nánd.

Leiðin var greið milli tindanna gegnum skarð sem liggur til vesturs
með kletta sem er okkar niðurstaða að nefnist Gráborg.

Klettahaft Gráborgar virtist göngufært sunnan megin í sumarfæri alla vega eitthvað áleiðis
og þá er best að nálgast hana neðan við Hólstind í suðri þar sem við settum á okkur gormana.

Kalli, Ásta H., Kári Rúnar og Ingi hér á leiðinni um skarðið frá Hólstindi yfir á Tröllatind.

Sjá myndband þjálfara af uppgöngu á tind tvö - Tröllatind:

http://www.youtube.com/watch?v=knbM_3Xg6AA

Á Tröllatindi gafst annað útsýni en á fyrsta tindinum því nú höfðum við óskerta sýn yfir norðurhluta Snæfellsness með öllum þess fjörðum og vötnum á norðurströndinni... m. a. Kolgrafarfjörð, Hraunsfjörð, Bjarnarhafnarfjall, Selvallavatn, Hraunsfjarðarvatn og Baulárvallavatn o . m. fl. :

Hraunsfjarðarvatn, Baulárvallavatn og Ljósufjöll í skýjunum lengst til hægri ásamt fleiru.

Sjá þetta magnaða útsýni í myndasafni Þjálfara úr ferðinni:

http://www.picasaweb.com/Toppfarar

Heilluð af útsýninu tókum við myndir af strákunum:

Efri frá vinstri: Kalli, Hermann, Hjölli, Anton, Kári Rúnar, Örn, Jóhannes Rúnar og Óskar Bjarki.
Neðri frá vinstri: Þorsteinn, Gnýr, Ingi, Gylfi Þór, Óskar Úlfar og Ketill.

Og af stelpunum sem voru heldur fleiri og eru stundum duglegri að mæta...:

Efri frá vinstri: Rósa, Birna, Brynja, Elsa Þ., Sigga Sig., Steinunn, Áslaug, Inga, Snædís, Anna Elín, Heiðrún og Sigrún:
Neðri frá vinstri: Bára, Gerður, Valgerður, Nanna P., Ágústa, Harpa, Helga Sig., Ásta H., Lilja Sesselja, Hildur Vals., og Halldóra Þórarins.

"Kynja"myndirnar voru teknar á útsýnispalli Tröllatinds og hér er gengið til baka aftur yfir á tindinn sjálfan
með Tröllatindahrygginn vinstra megin neðar og Elliðatind fyrir miðju.

Hildur Vals., Kalli, Áslaug, Bára, Inga, Ketill, Lilja Sesselja, Halldóra Þ., og Birna?

Á Tröllatindi í mældri 938 m hæð en hann er svipaður að hæð og Hólstindur - munar í mesta lagi 1 m til eða frá.

Síðasti tindurinn eftir... Tröllatindahryggurinn...
við vildum ekki sleppa honum til að vera alveg örugg með að hafa nú gengið á Tröllatindana sjálfa... Elliðatindar í baksýn.

Hryggurinn var auðgenginn upp með og sjá mátti hvernig snjóhengja var að myndast þarna
meðfram hryggnum á leiðinni í norðri.

Sjá myndband þjálfara af uppgöngunni á þriðja tindinn á YouTube:

http://www.youtube.com/watch?v=hQOGDy6wtPc&feature=related

Helga Bj., Snædís, Lilja Sesselja, Gylfi Þór, Birna, Ketill og Halldóra Þ.

Tindarnir tveir sem voru að baki; Hólstindur og Tröllatindur í baksýn og glittiraðeins  í klettahaft Gráborgar fjærst.

Á Tröllatindahryggnum í 882 m hæð en hryggurinn rís lítið eitt hærra aðeins austar...

Vð sáum ekki fram á að hafa tíma til að klöngrast alls 37 manns eftir honum öllum eftir ról og dól á fyrri tindum... menn voru sáttir við að láta þennan duga og snúið var við í suðvestur í átt að Hólsfjalli vestan við Kaplakinnar niður í Furudali að Leysingjahamri þar sem skriðan beið okkar alla leið að bílunum.

Ætla mátti í fyrstu að við þyrftum að snúa við gegnum hlíðar tindana í bakaleiðinni þar sem við vissum að dalurinn er sundurskorinn giljum og gljúfrum en ofan af Tröllatindum var auðsýnt að við gátum látið okkur rúlla gegnum dalina ofan við gljúfrin sem stytti og einfaldaði bakaleiðina.

Úsýnið af tröllatindahryggnum í átt að Hólstindi þar sem hópurinn var aldeilis fljótur að koma sér niður...

Pása til að þétta hópinn og fækka fötum...
þetta var sérkennilegur dagur...
gengið á bolnum í brakandi vetrarsólinni...
líkt og það væri frekar svalur júní en nóvember á tímabili...

Auðvitað fundum við eina snjóbrekku til að renna okkur niður um :-)

Sjá hópinn dreifast niður eftir snjófölinni að snjólínu.

Komin í mjúkan mosann í austurhlíðum Hólsfjalls með Hafursfellið í fjarska fjær...

Það er jú komið á forgangslista biðlistans...

Síðasta nestispásan við Leysingjahamarinn með kvöldsólina að hníga í suðvestri.

Hvílíkur dagur að baki að við áttum varla til önnur orð en þau að halda áfram að dásama hann alla leið til enda...

Hólstindur - tröllatindur - Tröllatindahryggur

Þetta var að baki...

Frá þessu sjónarhorni finnst manni sanngjarnt að Hólstindur fái að heita sérnafni en hinir heiti allir Tröllatindar þar sem þeir eru í beinni línu en Hólstindur sunnar og meira sér... um leið er eðlilegt að þeir heiti allir Tröllatindar... svona lætur maður... endalaust að velta vöngum yfir nöfnum landslagsins sem er samt svo miklu stærra en nöfn... en... þegar tækifæri gefst mun maður grípa það og spyrja einhvurn bónda í Staðarsveitinni um staðarhætti og nafngiftir...

Tröllatindar dáleiðandi

Tröllin og tindana töfrandi
tæru toppunum tiplandi
tókumst við á þá trítlandi
á tetrinu sálar tindrandi
(Bára)

Skriðan tók svo við þétt og löng og grimm í lok dagsins síðasta kaflann að bílunum í steikjandi hitanum af sólinni...
og hnén kvörtuðu sem aldrei fyrr, jafnvel hjá þeim sem aldrei finna annars fyrir þeim.

Dagurinn var nánast runninn... við vorum komin að upphafsstað þar sem við höfðum lagt af stað í fyrstu geislum sólarinnar í í suðaustri... og nú geisluðu síðustu sólstafirnir í suðvestri...

Gengið var í 6:15 - 6:30 klst alls 11,8 km upp á þrjá tinda í 939 m - 938 m - 882 m hæð (930 m skv. Landmælingum)
með 898 m hækkun eða alls um 1.238 m hækkun milli tinda miðað við 41 m upphafshæð.

Hugfangin af fjalladýrð Snæfellsness viðruðum við ferðina í heita pottinum í Borgarnesi á leiðinni heim
og vorum ekki söm eftir daginn...

Byrjað var að semja fjallalag Toppfara í ferðinni fyrir tilstilli Helgu Bj... sjá síðar...
og nú skulum við alltaf semja eina eða fleiri vísur um hverja ferð til að birta í ferðasögunni...
...bara einhverjar línur sem fanga upplifun viðkomandi af deginum - sendið mér ykkar línur sem fara í ljóðasafn Toppfara sem brátt fær sína síðu hér á vefnum!

Allar myndir á http://picasaweb.google.com/Toppfarar

Og öll myndböndin á: http://www.youtube.com/results?search_query=BaraKetils&search_type=&aq=f

Og... myndir og myndbönd félaganna á fésbókinni og myndasíðum- sjá tenglar.

Takk fyrir frábæran anda og ógleymanlegar stundir !
Þetta var magnaður dagur sem aldrei líður úr minni...

Við erum á toppnum... hvar ert þú?
www.toppfarar.is

Toppfarar ehf - Viðarrima 52 - 112 Reykjavík - Kt: 581007-2210 - Sími: +354-867-4000 / -899-8185 / -588-5277 - Netfang: bara(hjá)toppfarar.is
Copyright: Höfundarréttur: Bára Agnes Ketilsdóttir