Tindur nr. 14 - Laugavegurinn helgina 8. - 10. ágúst 2008
Nautsterkir fjallgöngumenn í toppformi...
|
Mögnuð ganga
um eina fallegustu gönguleið Íslands... |
Eftir
akstur úr Reykjavík frá því kl. 7:05 um
morguninn í blíðskaparveðri með stuttu
morgunverðarstoppi í Hrauneyjum vorum við
komin í Landmannalaugar um kl. 10:20 og
tókum okkur hálftíma til að koma okkur af
stað. Fjölmennt var í Landmannalaugum, veðrið gott, lygnt, hlýtt og hálfskýjað. |
Lagt
var af stað gangandi kl. 10:48 og var
gönguleiðin strax hreinir töfrar um
Laugahraunið í átt til óbyggðanna... Hér litið til baka til Landmannalauga af stígnum eftir fimm mínútna göngu. |
Hrafntinnusvartklæddir Toppfarar að falla algjörlega í kram Laugahrauns... |
Brennisteinsalda
(855 m)
greip anda okkar á lofti og útsýnið tók við
þeim andardrætti... Fjöldi manns á ferðinni um svæðið og skv. lista ferðafélagsins í skálanum voru 47 manns þegar lagðir af stað upp í Hrafntinnusker þennan dag í 1-2ja manna hópnum og einum 11 manna hópi auk annarra óskráðra. |
Snjóskaflar innan um jarðhita í ljósbrúnum og bleikum fjöllum... vorum við stödd í teiknimynd eða á þessu undurfallega landi Íslandi...? |
Fagrar
fjallakonur umkringdar fögrum fjöllum...
|
Sólin gyllti allt upp með líparítinu þegar skýin viku fyrir henni og landslagið var undursamlegt. |
Allst staðar rjúkandi hverir og brennisteinslykt, útsýnið óborganlegt og við þökkuðum okkar sæla fyrir að fá svona gott veður á þessu svæði. |
Íris Ósk, Jón Ingi, Björgvin, Stefán Jóns, Guðbrandur, Rannveig, Guðjón Pétur og Ragna að hvílast með Landmannalaugar, Laugahraun, Brennisteinsöldu, Veiðivötn, Snjóöldu og fjöllin handan þess í baksýn., |
Stórihver rjúkandi hægra megin framundan og Söðull við Hrafntinnusker framundan. |
Hlýir litir leiðarinnar í mótsögn við svartan sandinn, myljandi hraunið og kalda snjóskaflana. |
Fórum fram úr einum stórum hópi þar sem með í för voru þrír unglingar, 14 - 15 ára sem gengu rösklega og voru ekki að fara leiðina í fyrsta skipti enda skein af þeim sælan með verkefni dagsins. |
Við björtum fjöllum tók svartur sandur, grjót og hraun við Hrafntinnuskeri og glitraði hrafntinnan í fjarska eins og silfur eða gimsteinar. |
Slóðinn eins og sjá má mjög þægilegur og erfitt að villast nema í mikilli þoku en við gengum fram á minnisvarðann um unga manninn, Ido Keinan, 25 ára, sem týndist á þessum slóðum fyrir fjórum árum síðan í lok júní. |
Snjóskaflar
voru nánast engir á leiðinni sem var harla
ólíkt slóðinni í Laugavegshlaupinu þann 12.
júlí s. l. og sýnir hve hratt landslagið
breytist eftir árstíð og tíðarfari allt árið
um kring. Hvílíkt veðravíti þetta er í hörðu vetrarveðri... en það væri gaman að fara þarna um á snjósleða einhvern tíma í sólríku veðri með allt á kafi í snjó... |
Komin
að Höskuldsskála í Hrafntinnuskeri eftir
tæplega 3 klst.
göngu 10,2 km upp
475
m úr 598 m hæð í
1.073 m. Sólin skein og engin þoka svo staðurinn var bara hinn notalegasti. Skerið sjálft er 1.128 m hátt |
Nestistími
þar sem menn borðuðu úti eða inni. Mikil uppbygging á Laugavegsgöngusvæðinu hefur farið fram hjá Ferðafélaginu síðustu ár og mátti t. d. sjá þessa viðbyggingu við skálann í Hrafntinnuskeri sem örugglega breytir miklu fyrir staðinn. |
Lagt af stað eftir góðan hádegismat í fallegu veðri niður í átt að Kaldaklofsfjöllum (1.259 m) og Jökultungum með Söðul (1.132 m) að baki í norðri og Reykjafjöllin (1.185 m)á vinstri hönd í austri en þau voru anzi freistandi uppgöngu svona nálægt og tilfefni til þess að gista í Hrafntinnuskeri einn daginn og ganga á nærliggjandi fjöll. |
Landslag jökulgilja norðvestan Kaldaklofsfjalla. |
Háskerðingur vinstra megin á mynd en ganga þarf um fellin norðvestan hans og yfir jökulinn til þess að komast upp á hann en það gerðu Halldóra Ásgeirs og Roar fyrr í sumar í fallegu veðri. Sagt er að tilfinningin uppi á Háskerðingi í góðu veðri sé eins og að standa á þaki heimsins... með fjöllin öll, óbyggðirnar og svo strendurnar lengst í burtu fyrir fótum sér... |
Snjóskaflarnir
óðum að hopa fyrir sumarhitanum. Þegar sólin skein snarhitnaði í svörtum sandinum en annars var svalur vindur ofan af jöklinum.
Erfitt að velja hvaða myndir fái að vera stórar á vefnum (þær taka mun meira pláss) ... þær eru svo margar fallegar úr þessari ferð... |
Lækjarsprænurnar sem við tipluðum yfir voru óteljandi á leiðinni, sandurinn mjúkur og landslagið og undirlagið svo fjölbreytt að auðveldara er að fara langar dagleiðir á þessu svæði en ella. |
Ólýsanlegt landslag... |
Pása
í sólinni með heiminn í fangið...
Einn flottasti nestisstaður í sögu klúbbsins... |
Háskerðingur og Toppfarar á góðum degi. |
Kaldaklofsfjöll framundan en við beygjum framhjá þeim og til suðurs við fjallsræturnar og göngum þá niður Jökultungurnar. |
Gullið landslag í hvítum snjó undir bláum himni. |
Skyndilega fór að glitta í útsýnið til suðurs... jöklana og keilullaga fjöllinn við Álftavatn hvert öðru líkara. |
Álftavatn með félögunum sínum fjöllunum... keilulaga í ýmsum útgáfum og ágætis verkefni að átta sig á meðan maður gekk. Torfatindur (785 m) hægra megin við vatnið (vestan), Brattháls (751 m) vinstra megin, Stóra Grænafjall (881 m)sunnan við vatnið (við Torfatind) og fjær lægra fjall; Illasúla, lengra til austurs við Brattháls rís svo Stóra Súla tignarlega og enn lengra til suðurs frá Bratthálsi að Mýrdalsjökli rís Hattafellið líklegast. Mýrdalsjökull - Eyjafjallajökull - Tindfjallajökull í skýjunum. |
Guðbrandur, Rannveig, Alexander, Íris Ósk, Guðmundur Ólafur og Jón Ingi að á valdi útsýnisins takandi myndir af dýrðinni. |
Áfram
haldið um gulu gilin með Kalfaklofsfjöll
framundan.
Sjá Toppfarana í hlíðinni ofarlega vinsta megin... |
Leirinn
þurr og góður en getur verið sleipur á
þessum kafla í blautri tíð. Skórnir voru vel leiraðir engu að síður eftir þennan dag þar sem farið var úr leir og niður gil yfir læki til skiptis. |
Álftavatn, Jöklar, fjöll og Toppfarar að dáleiðast niður jökultungurar. |
Brekkan
langa niður að Álftavatni sem getur tekið í
hné og læri en var tekin á hraðferð af
þessum snarbrjáluðu Toppförum sem þarna voru
á ferð...
Hvílíkt form eru þeir komnir í...
Álftavatn er 1,2 ferkílómetrar að stærð og dýpst 22 m (Íslandshandbókin). |
Eftirfarar-þjálfara tókst að grípa í skottið
á Hraðförunum með
miklum köllum til að sameina hjörðina
landslaginu í einni mynd þegar Jóni Inga
varð það á orði að það væri nú ekki ónýtt að
mynda hópinn í þessu úsýni, en bakgrunnurinn reyndist
yfirlýstur þar sem við vorum komin of
neðarlega, en engu að síður flott mynd af
flottu fólki í flottu landslagi...
Björgvin, Gylfi Þór, Alexander, Rannveig, Örn, Guðmundur Ólafur, Guðjón Pétur, Jón Ingi, Ragna, Íris Ósk, Guðbrandur, Stefán Alferðs, Stefán Jóns., Hjörleifur, Roar, Halldóra Ásgeirs og Bára bak við myndavélina. |
Síðasti hluti brekkunnar á sömu hraðferðinni... |
Grashagakvísl í botninum sem gaf hópnum nýtt verkefni... að stikla fimlega yfir ef maður var langleggjaður eins og Örn og Guðjón Pétur eða bara vaða. |
Þegar Örn var kominn yfir reyndi hann að hagræða grjóti fyrir hina til að stikla yfir en féll við og blotnaði án þess að vilja gera meira úr því. |
Guðjóni Pétri kippti þeim yfir sem fóru með honum af miklum dug en flestir vöðuðu við mikla gleði og var afskaplega gott að viðra fæturna í svölu vatninu í sólinni eftir langa göngu. |
Vaðmennirnir aðstoðuðu svo breska fjölskyldu sem tvísteig á árbakkanum með enga vaðskó og komst ekki yfir. Þau fengu lánaða vaðskóna okkar og voru afskaplega þakklát. |
Slóðinn svo að Fjallabaksleið Syðri sem liggur m. a. að Keldum á Rangárvöllum um gullfallega aksstursleið þar sem ekið er með einu myndarlegasta fjalli að Fjallabaki, Laufafelli (1.164 m) (spennandi fjall framtíðar fyrir Toppfara...) og farið yfir Markarfljót. |
Hvað jafnast á við litadýrð íslenska mosann þegar líður á sumarið... barasta blóm hálendisins og urðarinnar á Íslandi! |
Skálar
Ferðafélags Íslands við Álftavatn sem
reistir voru síðsumars 1979 en nú er þar í
byggingu nýr og myndarlegur skáli sem sést á
myndinni. Tjaldstæði Álftavatns er óumdeilt eitt það fallegasta á hálendi Íslands.
|
Björgvin og Guðjón Pétur að skoða kortið "Þórsmörk - Landmannalaugar" sem gaf góða sýn á örnefni og staðhætti á leiðinni... |
Góður
nestistími var tekinn við Álftavatn þó ekki
væri langt eftir í Hvanngil, blómlegt mannlíf
var á svæðinu og veðrið gott. Rannveig að plástra tær og hæla með aðstoð Alexanders en helmingur hópsins var kominn á plástra þessa helgina og fékk aldeilis góða æfingu í þeim málum við aðstæður þar sem vaða þurfti fjórar ár og ganga langar leiðir dag eftir dag. |
Lagt af stað frá Álftavatni í kvöldsólinni með 3-5 km framundan að Hvanngili sem reyndust svo vera 4 km. |
Ein af mörgum gullfallegum myndum þessarar leiðar. |
Vað nr. tvö yfir Bratthálskvísl og nú náðist Guðbrandur á mynd að bera konuna sína á bakinu eins og herforingi en Rannveig var þarna farin að berjast við blöðrur sem ekki gátu blotnað með plástrunum. |
Bratthálskvísl
að baki, Jökultungur í baksýn og brekkan sem
við gengum niður með útsýninu fyrr um
daginn. Ofar eru svo Kaldaklofsfjöll, Torfajökull og Háskerðingur þó ekki sjáist þau á mynd. |
Mýrdalsjökull
glitrandi framundan í kvöldsólinni og tindar
fjallabaksleiðar syðri sem liggur norðan
Mýrdalsjökuls og er mögnuð í góðu veðri. Stóra Súla (918 m) til suðurs sem er ágætis kennileiti við Hvanngil en um leið voru fjöllin á svæðinu svo keimlík að maður ruglaðist nokkrum sinnum með stæl en festi bara landslagið betur í minni fyrir vikið. |
Komin
að Hvanngili um hálf átta leytið, styttum
okkur aðeins leið framhjá veginum á eftir
Jóni Inga og allir fegnir að geta loksins
hvílt lúin bein eftir langan dag, 3,5 klst.
rútuferð +
26,9 km
göngu á 8:40 klst. Veðrið var síst í Hvanngili þennan dag og áberandi kuldalegra en í Álftavatni en er fallegur staður í góðu veðri.
|
Kvöldið
var notalegt í Hvanngili, góðar sturtur og
mjög fín eldunaraðstaða, stemmningin góð og allir
hressir... þrír erlendir ferðamenn en annars
áttum við skálann fyrir okkur. ...best var samt súkkulaðakakan hennar Halldóru með jarðarberjum og gervirjóma sem smakkaðist dásamlega eftir dásamlegan dag, hvílík snilld við útilegu aðstæður. Hjartans þakkir Halldóra ! |
Björgin og Hjörleifur komnir í rúmið en alltaf í stuði... |
Vaknað
fyrir kl. 8:00 og lagt í hann
kl. 9:10 eftir
tiltekt og allt saman. Veðrið heldur hráslagalegt og lítið í stíl gærdagsins eða veðurspárinnar sem spáði enn meiri sól þennan dag, þungskýjað, gola og rigningarlegt. Við skyldum bara ganga úr þessu og inn í sólina... sem reyndist réttur ásetningur en heldur var hann lengur að rætast en leit út fyrir því alltaf var léttskýjaði himininn lengra í burtu þarna sem við áttum eftir að ganga sandana í súldinni. |
GPS-strákarnir Hjörleifur og Roar en sá hópur fer ört stækkandi... annar hver maður í hópnum orðinn tæknivæddur svo við erum í góðum málum. |
Hvanngil
að baki og fjöllin í þokuslæðingi efst en
lygnt og tiltölulega hlýtt og skyggni gott. Dagurinn hópst á göngu yfir Hvanngilshraun sem talið er koma undan eldstöð í Mýrdalsjökli. |
Hvanngilshnausar
í suðaustri og lengra svo
Bláfjöll og
Smáfjallarani. Kaldaklofskvísl fljótlega á vegi vor með göngubrú og víðsjárverðu vaði fyrir bíla en brúin var reist 1985. Bláfjallakvísl tók svo við eftir það en hún var köld og breið en vel fær. Innri Emstruá varð svo fyrir okkur eftir um 4 km en rætt var m. a. um örnefni þessara beggja Emstruáa sem einnig hafa verið nefndar syðri og nyrðri / fremri og aftari / neðri og efri, sjálfsagt til að skerpa á staðsetningu en heimamenn halda sig við Ytri og Innri. Gamli jökulhlaupfarvegurinn sem á vegi okkar varð er talinn vera eftir 2.500 ára gamal jökulhlaup úr Entujökli sem hafi hlaupið mili Stórkonufells og Smáfjalla, klofnað í tvennt og myndað Hattfellsgil og Fauskheiðargil og brotist fram í Markarfljótsgljúfur (Íslandshandbókin). |
Sandurinn
var genginn rösklega með Stórusúlu á hægri
hönd og svo Súluhryggi yfir
Hattafellshraun
sunnan Innri Emstruár en það er talið hafa
runnið undan Mýrdalsjöklil. Áð var svo við Útigönguhöfða með Hattafell (924 m) í fangið en heldur fór þjálfari villur vegar þegar honum fannst þetta vera Stóra Grænafjall... ...Það var ekkert skrítið að maður las kortið vitlaust á þessum gönguhraða því Guð hjálpi manni ef maður stoppaði til að skoða kort... þá týndi maður hópnum...;) Hópurinn komst að því að Örn átti afmæli þennan dag þó hafi það átt að vera leyndarmál og Guðbrandur og Rannveig áttu brúðkaupsafmæli. Er hálendið ekki góður staður til að halda upp á svoleiðis? |
Gengið um Tuddahraun sunnan Hattafells sem talið er elsta hraunið á svæðinu ug upprunnið úr gígröðinni ofan Botnum sem hylja skálann í Emstrum þar til komið er fram á skálann. Sandarnir áfram að Emstrum með Hattafellið á hægri hönd og svo í bakið, Stórkonufell (950 m) á vinstri hönd fjær (ekki á mynd) og Tudda og Tvíböku nær (á mynd).Það var að létta til og blámi himins að lýsa upp sandana með stöku sólargeislum
|
Komin
í Botna að skála ferðafélagsins við Emstrur.
Eftir á að hyggja hefði verið gaman að fara að Markarfljótsgljúfri þar sem hópurinn hafði gengið það rösklega en það hafði aldrei hvarflað að þjálfurum að þessi dagur biði upp á nokkuð annað en hefðbundna leið og því var of seint að snúa þangað þegar flestir voru komnir í skálann töluvert neðar. Roar bendir hér í áttina að þeirri leið sem þá hefði verið farin.
|
Góður
nestistími við skálann í góðu veðri.
Blöðrurnar farnar að spilla svo fyrir að Rannveig ákvað að fá far með rútunni síðasta legginn enda gengið þetta áður. Alexander fór sömu leið en hinir héldu áfram með nýja plástra á fótum og magann fullan af orku fyrir síðustu 13 km... |
Gengið frá Emstrum um hálendisgil úr móbergi sundurskornið með vaxandi hvömmum sem smám saman skörtuðu meiri gróðri þar til birkiilmur Þórsmerkur tók við. |
En
fyrst skyldi fara yfir
Ytri Emstruá sem
brúuð er yfir hrikalegt gljúfrið. Brúin var vígð 30. september 1978 og þann dag er fyrsta ferðin á Laugaveginum á vegum Ferðafélags Íslands skráð,en fyrsta Laugavegsgangan á vegum félagsins var svo farin 13. - 18. júlí 1979 (Laugavegurinn - FÍ 2008). Keðjukaflinn var lítið mál fyrir hrausta menn og útsýnið magnað. |
Við tóku Almenningar, afréttur Vestur-Eyfellinga með skriðjökul Mýrdalsjökuls næstan okkur er kallast Entujökull og gefur af sér Ytri Emstruá. Einn af mörgum göngutúrum mögulegum á þessu svæði er að upptökum árinnar við jökulsporðinn þar sem allavega einn foss gefst á leiðinni eftir minni þjálfara. Eftirfarar-þjálfarinn reyndi að halda hópnum saman svona til að njóta þess betur að ganga og kallaði á eftir liðinu þegar gengið var niður að ánni og sýndist sitt hverjum með þessa gjörð en þessir tilburðir entust stutt á orkumikinn hóp í toppformi...
|
...en
þó tókst að kreista fram útúrdúr að
Markarfljótsgljúfri þar sem Emstrúáin
sameinast Markarfljóti og sveik útsýnið
engan þó ekki jafnist þetta við svipmestu
útsýnisstaðina um gljúfrið eins og steinsnar
frá Emstrum. Þar nær gljúfrið 160-180 m dýpt og er í sinni hrikalegustu mynd en um er að ræða um 1 km gönguleið frá Emstruskálanum og góð kvöld- eða morgunganga frá skálanum fyrir þá sem þar gista. |
Talandi
um Laugavegshlaupið og önnur hlaup á
göngunni (Bára og Stefán Alfreðs) fór þá
ekki tveir vaskir hlauparar fóru framhjá okkur
á þessum kafla á flúgandi fart eins og við
manninn mælt... furðuleg tilviljun.
Þar fóru Þorbergur og kári Steinn, eðalhlauparar sem sögðust stefna á 6 tíma niður í Þórsmörk og miðað við kraftinn og ástand þeirra var ekki hægt að efast um þessa áætlun. Þá urðu einnig á vegi okkar önnur en nú íslensk fjögurra manna fjölskylda með grunnskólabörn og hvítan hund sem kom gangandi frá Emstrum og stefndi í Langadal. Ekki voru þau að heyra ísbjarnarbrandarann í fyrsta skipti en við stóðumst ekki mátið... hundurinn líktist ísbirni í fyrstu úr fjarlægð... í alvöru... |
Hvar er þetta Bjórgil... þetta er nú bara vatn... nú er það seinna?... jæja, drífum okkur... við höfum ekkert að drekka í Slyppugili... |
Bjórgil sem bara bauð upp á afvötnun og sífellt gróðursælla umhverfi með hækkandi hitstigi og sterkari sól. |
Mýrdalsjökull og svo út af mynd Fimmvörðuháls og Eyjafjallajökull frá sjónarhorni Almenninga... svæðið sem við horfðum á fyrir tveimur mánuðum síðan ofan af Fimmvörðuhálsi og Morinsheiði í glampandi sól og góðu skyggni... |
Hattafell langt að baki okkar nú, fjallið sem við borðuðum nesti við fyrr þennan dag... hvílíkt afrek að ganga langar dagleiðir tvo daga í röð á þessum blússandi hraða... |
Síðasti nestistíminn sem ekki var tekinn mynd af vegna tímaleysis eins og fleira þennan dag, fór fram í birkiilmi og sólargeislum en svo var lagt í síðasta áfangann.. þessa Kápu sem var víst eitthvað smá fjall og svo Þröngá sem var víst mesta vatnsfallið á leiðinni... |
Klettar og klappir Þórsmerkur. |
Mýrdalsjökull að bjóða Toppfarar velkomna í birkigrónar fjallsrætur sínar. |
Ljósá
og Kápa framundan í blíðskaparveðri. Hér var komin aðeins gola svo ekki fækkuðum við mikið fötum þó vel hefði það mátt... við vildum bara klára þetta og komast í pottinn og ískaldan öl... |
Einhyrningur, Jón Ingi, Ragna, Gylfi Þór, Halldóra og Örn. |
Sjá hópinn liðast upp að Kápu eftir Ljósá. |
Brúin yfir Ljósá með Einhyrning í baksýn... eitt fjalla sem eru á dagskrá framtíðarinnar. |
Brekkan
í Kápu...lítið mál fyrir þá sem voru í
gírnum og hafa gengið á fjöll mánuðum saman
við allar aðstæður. Hæðin mældist 351 m frá 255 m hæð við Ljósá eða 104 m hækkun þar. |
Tindfjallajökull nánast snjólaus að austan í baksýn... líka á dagskrá vonandi á innan við ári... |
Þarna
bara urðum vi að taka mynd af þeim sem enn
héldu hópinn með þjálfurum. Rjúpnafell (824 m)m Mýrdalsjökull (1.493 m), Tindfjöll (557 m)... Hálldóra, Jón Ingi, Gylfi Þór, Guðjón Pétur og Bára en Örn tók mynd. |
Þröngáin
var straumþung, gruggug og virtist djúp svo
menn fóru í tvennum yfir en gekk vel. Náði vatnið upp á mið læri og var mikið ævintýri að fara þarna yfir, fín æfing í að vaða straumþunga á í grýttum jarðvegi þar sem mann sundlaði strax ef maður gleymdi að horfa á fastan punkt á árbakkanum hinum megin... og maður mátti ekki missa taktinn við félagann til þess að detta ekki... ...en þegar skvetturnar fóru upp í klof á háfættum þjálfurunum tóku einhverjir þá ákvörðun að fara á eftir Guðjóni Pétri sem finnur alltaf vað að eigin smekk og hefur mjög gott nef fyrir því. Sjá má snúninginn hans hér frá vaðinu sem hinir höfðu valið áleiðis að grynnra vaði ofar í ánni... ekki lengi að þefa uppi betri stað... enda tilnefndi þjálfari hann "vaðmeistara hópsins" síðasta vetur... |
Guðbrandur
og Stefán Alfreðs. að leggja í hann með
göngustafina á milli sín eins og Guðbrandur
hafði góða reynslu af úr veiðiferðum... Sjá glitta í Rögnu framar með ána upp á mið læri... |
Guðmundur
Ólafur og Gylfi Þór með sömu aðferð sem
gafst vel en annars er venjan líka að krækja
olnbogum saman og kljúfa strauminn með efsta
manni og hafa þann neðri til stuðnings. Séu menn fjórir skulu efstu menn vera sterkir og stöndugir enda skellur straumurinn á þeim en á móti kemur að þeir þurfa stuðninginn frá þeim sem neðar standa til að vera stöðugir og þannig halda menn góður róli yfir mjög djúp og breið vötn. |
Um
Hamraskóga í Þórsmörk en mörkin geymir um
170 tegundir háplantna
auk fjölmargra
mosategunda. Rómuð er veðursæld Þórsmerkur og talið að jöklarnir þrír sem umkringja hana dragi í sig úrkomu þegar rakir vindar blása sunnar enda er nánast undantekningarlaust sól og blíða í Þórsmörk þegar þjálfarar eru þar... |
Komin
í Húsadal í sól og blíðu. 29,8 km að baki á 9:04 klst. með 364 m lækkun frá 571 m í Hvanngili upp í 600 m hæð og niður í 206 m hæð.
Í heild var því gangan frá Landmannalaugum í Húsadal í Þórsmörk á tveimur dögum 56,7 km á 17:44 klst. upp i 1.073 m hæð með hækkun upp á 475 m og lækkun upp á 392 m en þó í heildina mikið meira til samans hækkanir og lækkanir eða kringum 1.800 m (2.700 m?) hækkun og 2.100 m (3.093 m?) lækkun - hvað segja önnur gps? Hitt gps þjálfara mældi þetta á 53,3 km, Roar mældi þetta á 54,4 LOG- 53,3 km vistuð leið... |
Kletturinn
Assa ? sem gnæfir yfir Húsadalssvæðið og
heiti potturinn með útisturtunum í grasinu
fyrir neðan. Guðmundur Ólafur var kominn í pottinn þegar síðustu menn skiluðu sér í mörkina en tæpur hálftími skildi á milli fyrstu og síðustu manna þennan dag. |
Eitt það fyrsta sem menn gerðu var að fara úr skónum... og svo að fá sér öl eða annan góðan drykk... og svo að fara í pottinn... svo klæðast þægilegum fötum... grilla... borða góða máltíð... og hlæja fram á nótt... |
Potturinn var aðeins of volgur en óskaplega notaleg hvíld með ölinu og félögunum sem viðruðu dagana sem á undan voru gengnir enda máttu menn vera sáttir með frammistöðuna... hún var framúrskarandi. |
Kvöldmatur með meiru í kvöldsólinni og notalegheitum, dúkum, sallati og servíettum... |
Bitarnir á grillinu voru þykkir og góðir og sjaldan eins girnilegir eins og eftir erfið líkamleg átök í fleiri en einn dag á naumhyggjulegu nesti. |
Skál
fyrir 56,7 km... Bílstjórinn Páll og sonur hans, Friðrik borðuðu með okkur og hláturinn glumdi um Húsadal ásamt ærslum hestamanna og annarra göngumanna í góða veðrinu þetta kvöld. Heldur varð svalara með kvöldinu og það leit út fyrir heiðskírt veður daginn eftir með næturkulinu. |
Halldóra
með einstakri umhyggjusemi sinni breiddi..
hvað hét þetta nú aftur... eitthvurt sjal..
yfir Björgvin sem var orðið kalt og hann
sleppti því ekki fyrr en svefnpokinn tók
við... Glaumurinn færðist smám saman inn í hús þegar rökkvaði og var góður fram yfir miðnætti þegar menn gáfu eftir og hentust í rúmið. |
Engum hugnaðist að ganga á Valahnúk daginn eftir þó veðrið gæfi tilefni til þess með heiðskíru, logni og hita strax um átta leytið á sunnudagsmorgun, en í staðinn vildu menn fara snemma í bæinn enda búnir að vera frá fjölskyldu og börnum í tæpa þrjá daga og voru þjálfarar sammála þessu. Við heimferðina varð þó óvænt en frábær viðbót er Stefán Alfreðs (24 tinda fari árið 2007) leiddi okkur um blautan slóða í Nauthúsagili að glæsilegum fossum þess en þarna var hann á kunnugum slóðum enda smalar hann fé um mörkina ár hvert með frændfólki sínu... |
Brekkan með kaðlinum niður gilið sem helmingur hópsins fór um. |
Komin niður í gilið sem var strax undurfallegt og togaði mann innar. |
Lægri
fossinn og sólargeislarnir sem stungust
niður ofar. Kaðall á slóðanum utan í veggnum hinum megin og við veltum því fyrir okkur hvort fara skyldi alla leið þegar Alexander tók af skarið og skellti sér af stað og íris Ósk á eftir og svo hinir... auðvitað skoðum við þetta... Við sáum ekki eftir því.. þetta var auðveldara en það sýndist og ekkert mál þó flestir væru á sandölum eða léttum skóm en ekki lúnum gönguskónum sem ekki voru girnilegir á þessum sunnudagsmorgni í hitanum. |
Fossinn
sem innar gafst umkringdur mosagrónum
klettaveggjum á alla vegu...
Einstakur staður sem gerði mann hljóðan. Að hugsa sér að hverja einustu sekúndu allt árið um kring rennur þarna vatn í fossandi þolinmæði og staðfestu... nema það fari í ís yfir veturinn... en... töfrandi staður. |
Guðjón
Pétur, Hjörleifur, Stefán Alfreðs.,
Alexander, Guðmundur ólafur, Stefán Jóns.,
Íris Ósk og svo Friðrik, 11 ára sem var
frábær félagi okkar í ferðinni og verður
vonandi fjallamaður í framtíðinni, Björgvin,
Örn og Bára bak við myndavélina.
|
Hér fikrar Stefán Alfreðs sig til baka eftir reipinu sem gerði okkur kleift að komast að fossunum... Við vorum honum mjög þakklát fyrir þessa viðbót við ferðina og fengum að heyra fleiri sögur af spennandi stöðum á svæðinu, m. a. flaki breskrar herflugvélar á skriðjöklinum sem hann hefur heimsótt tvisvar en sá göngutúr tekur heilan dag með ísexi og brodda... |
Reynirinn
sem frægur er á þessum stað og liggur í
rótum utan á berginu og yfir gilið en það
þótti hreystimerki að geta farið yfir á
Reyninum.
Hann er fulltrúi þess Reyni-hríslu-uppvaxtar sem kona okkur á heiðurinn af (vantar nafn) en uppruni Reynihrísla á Íslandi er allur frá henni kominn utan þær hríslur sem koma erlendis frá. |
Slökun
í grasinu við rútuna í bakaleiðinni þar til
allir tíndust til baka úr gilinu en Stefán
þurfti svo að skjótast eftir gleraugunum sem
hann gleymdi inn frá og var bara notalegt að
liggja þarna í hitanum. Kominn í bæinn kl. 13:00 og sólin í algleymi í bænum líka og allir glaðir að vera komnir heim snemma og geta átt daginn með börnum, fjölskyldu eða bara sjálfum sér í hvíld og frágangi áður en vinnuvikan hæfist. Þjálfarar óska Laugavegsförum til hamingju með frábæra frammistöðu.. Þetta var virkilega vel af
sér vikið!
|
Við erum á toppnum...
hvar ert þú?
|