Toppfarar.is - Kröfuganga nr. 1

Brúnalogn á Baulu

Sjö toppfarar fóru kröfugöngu á Baulu Í Borgarfirði 1. maí
... og gerðu bara kröfu á sjálfan sig með að komast á tindinn...
...og nutu stórkostlegs útsýnis í góðu veðri og fínu færi í leiðinni...

Gengið var á grjóti og í sköflum á broddum eða hálkugormum
og gekk gangan mjög vel enda var komið upp eftir nákvæmlega 3 klst. göngu.
Staldrað við á toppnum í 30 mín skv. gps... veðurblíðan var slík... og niðurleiðin tók svo 2:30 klst.

Alls nákvæmlega 6:00 klst. ganga á 9,4 km (8,4 -9,7 e/hinum gps) langri leið á flottum degi
upp í 944 m hæð með 811 m hækkun.

Ingi sýndi okkur magnað stuðlaberg við fjallsrætur á leiðinni upp
sem hann og Heiðrún fundu fyrir tilviljun þegar þau gengu á Baulu síðasta sumar.
Svoleiðis gersemi hefst upp úr því að feta ekki troðnar slóðir heldur kanna ótroðnar...

Þetta var tilvalinn staður til að hægja aðeins á sér...

Aðkoman að fjallsrótum var 3,4 km með gamla jeppaslóðanum og svo beint á stuðlabergið
en ekki alla leið upp með Mælifellsgili eins og algengast er að fara um.

Þjálfarar voru með track frá Leifi Hákonarsyni af www.wikiloc.com en þar er farið inn með Mælifellsgili og upp hrygginn þar sem hann er minnst brattur eins og leiðin liggur í bók Ara Trausta og Péturs Þorleifs og er sú uppgönguleið eflaust best að sumri til.
Önnur spennandi leið væri að fara alla leið upp á skarðið milli Mælifells og Baulu og fara þar upp... prófum það síðar...

Við tóku brattar skriður Baulunnar sem láta ekki að sér hæða og hafa fælt margan manninn á brott...
Snjókoma beljaði skyndilega á okkur og skyggnið fór...
"Nú, já... yrði þetta svona... barningur í vindi og úrkomu enn einu sinni...
hvar var sólin sem skein svo glatt í byrjun gegnum skýjaþokuna"?

... en snjókoman stóð stsutt yfir... og aftur varð létt yfir og háskýjað.
Við eltum snjóskaflana til að létta okkur gönguna...
...en þó ekki í of miklum bratta svo við stefndum á öxlina smám saman.

- Baulan er klárlega betri uppgöngu í snjófæri en að sumri til - vitið til allir áhugasamir Baulufarar! -

Færið var hálla en í janúar í fyrra en snjóléttara á öllu svæðinu nema efst þar sem skafið hafði vel í hengjur
sem haldast í kuldanum í þessari hæð.
Ís og klaki var undir snjónum og steinarnir stundum hálir en þetta gekk mjög vel enda allt hörkugöngumenn á ferð.

Hádegismatur var í 700 m hæð í ca 43° halla með sjávarsýn til tveggja átta...
Hvammsfjörð í norðvestri og Hafursfjörð og Borgarfjörð í suðvestri...

Og farið var svo í brodda í 740 m hæð þegar snjóskaflarnir urðu harðir...
En fjögur okkar voru með brodda og hin þrjú hálkugorma sem rétt sluppu í þessu færi
en æskilegast hefði verið að allir hefðu verið í broddum.

Mælifell (7-800 m?) í baksýn og það glittir í Litlu Baulu (632 m) bak við Hildi en snarbrattar hlíðar hennar voru eins og smærri spegilmynd af Baulu og við ákváðum síðar á tindinum þegar hún blasti við í öllum sínum smærri glæsileika í samanburði við Baulu að þangað yrðum við líka að koma.

... í mögnuðum félagsskap Baulu og Borgarfjarðar...
Örn, Helgi Máni, Gylfi Þór, Hildur Vals., Soffía Rósa, Ingi...

Sjá Hafnarfjall og Skarðsheiði í baksýn en meira að segja Skessuhorn sýndi sig án skýja á tímabili.

Gylfi Þór á brúninni

Áður en við vissum af vorum við kominn upp á topp...
Tindurinn í augsýn aðeins suðaustar...

Þetta var magnað augnablik...

...og við stöldruðum þarna við með hengjuna og hamrana beint niður fyrir framan okkur
og dáleiðandi útsýnið í kring.

Örn og Ingi könnuðu aðstæður handan við hornið að tindinum frá öxlinni í norðvestri þar sem snjóhengjan hamlaði för á hryggnum á milli og þetta virtist ansi tæpt á þessum kafla...
...en færið ágætt og allir öruggir og ákveðnir að klára að hæsta punkti svo þetta gekk vel...

Og þá var ekkert eftir nema mergjaður spölurinn á tindinn...
Þetta gerist ekki mikið flottara á síðustu metrum fjallgöngumannsins...

Neðan frá séð var þessi snjóbrekka þarna efst óklífanleg og að manni hafði sótt uggur þegar ekið var inn að Bröttubrekku í byrjun dagsins... en þarna fórum við nú samt...
...og þetta varð aftur óraunverulegt þegar maður leit upp eftir Baulu í lok dagins...
Ómetanleg verðmæti...

Við fögnuðum tindinum...
Knús á línuna... myndir... síminn... hopp... og skopp... óborganlegt útsýni... eintóm gleði og hamingja...

Bára, Helgi máni, Örn, Soffía Rósa, Ingi, Hildur Vals og Gylfi Þór
Tekin með timer á myndavél Gylfa á nettum þrífót !

Soffía Rósa sýndi okkur sveitina sína í Norðurárdal...
20 ára draumur hennar að rætast að sjá bæinn sinn ofan af tindi Baulu !
Þessi mynd fer upp á vegg við hliðina á myndinni af Baulu!

Í fjarska sáum við svo Langjökul og óteljandi fjöll og sveitir.

"Hérna færum við niður... "
Ingi að skoppa óttalaus með öllu í brattanum!
Þjálfarar ætluðu sér niðurleið í suðvestri og Ingi sýndi okkur þessa sömu leið sem hann stúderaði síðasta sumar...
... hann langaði sko líka þessa leið niður... en vindurinn gnauðaði neðar í þessari vindátt
og leiðin var ekki spennandi í þeim hamagangi...
Þau veðurhljóð mega vera manni ógleymanleg í þessari göngu því lognið á tindinum var eins og galdrar.
... enda ætluðum við aldrei að koma okkur niður...

Við ákváðum því að það væri gott að eiga eitt spennandi verkefni eftir á Baulu að sumarlagi...
... nefnilega að fara þvert eftir fjallinu á upp- og niðurleið...
... nema lausagrjótið fari endanlega með okkur...

Niður var snúið eftir nákvæmlega 30 mín tindagleði skv gps með uppstreymi skýja í kringum okkur... fengum því miður ekki kristaltært skyggni á tindinum heldur var það loðið af þessum skýjaþyrli... hvað skyldi þetta nú nefnast...?
...en útsýnið opnaðist samt reglulega og þá tókum við andann á lofti og sáum allt um kring.

Hvassafell (m?) í fjarska eins og smár klettur
en hann hvessir sig tignarlega þegar ekið er um Norðurárdal og virkar sko stór þaðan!

Strax aðeins neðar varð skyggnið tært aftur...
Brattinn hér myndast nokkuð vel.
Niðurgangan tók næstum jafn langan tíma og uppgangan í þessum bratta.

Okkur tókst þetta...
Baula aftur sigruð af fimm okkar og Helgi og Hildur að fara hana í fyrsta sinn...
Ekki ónýt ganga það...

Bunga hinum megin Suðurárdals þar sem Vesturárdalur gengur norðan við Sátu (741 m) (hægra megin út af mynd) sem reis tignarlega upp úr heiðinni en við höfðum velt því fyrir okkur fyrr í ferðinni hvaða tindur þetta væri.
Austurárdalur svo norðar milli Kotfjalls og Bana svo þá eru nefnd öll systkini Norðurárdals :-)

Við fylgdum sömu slóð og á uppleið en fórum svo norðaustar við öxlina inn Mælifellsgil til að ná mosanum sem fyrst...

Hvammsfjörður hér í fjarska með Búðardal í fjarðarbotni - ekki af útsýni Baulu skafið...

Grjótið gjörsamlega að ganga frá okkur...
...hvílíkir hnullungar...

... lengri en stafirnir manns... var furða að við vorum næstum jafn lengi niður og upp...?

Ekki skrítið að tröllasögur gengu á Íslandi hér áður fyrr... maður virkaði eins og dvergur í þessum landslagi...
...og því engin fjarstæða að láta sér detta í hug að stærri öfl séu til en maður sjálfur.

Sjá myndband af grýtinu á fésbókinni og www.youtube.com/Baraketils
...sem samt virkar svo lítið á upptökunni... þetta eru ferliki við náin kynni !

Hildur vals og Örn

Og brattinn hér heldur hressilegur svona í lokin um hamrabelti sem við klöngruðumst yfir
neðarlega á niðurleið á styztu leið í mosann... 60° halli eða hvað ?! -
Sjá þetta hamrabeltið á næstu mynd rétt við Hildi.

Svo var allt klöngur skyndilega búið og við tók dúnmjúkur mosinn og grasi grónar grundir enn neðar...
Sólin steikjandi okkur á síðustu metrunum og við enduðum í 11°C við bílinn...
...sólbrennd og sælleg í hita og svita...
...sem var skolaður af í heitum potti í Borgarnesi á heimleið...
... og við tók hugurinn að vinna úr þessari mögnuðu göngu...

Gegnum grjót og skafl við gengum
Baulu á í góðum gír
veður grand og færi við fengum
fórum niður ansi hýr
(Bára að tjá sig á fésbókinni í tindavímu... )

...hvílík dásemd að nota 1. maí til að krefjast einskis nema þess að toppa Baulu
...og gera með því kröfu á sjálfan sig og engan annan... !

Er það kannski leiðin til betri heims...
Maður líttu þér nær !?

Sjá myndir og myndbönd á fésbókinni - www.youtube.com/BaraKetils
Á myndasíðu Toppfara: www.picasaweb.com/Toppfarar og hjá Gylfa Þór: www.123.is/gylfigylfason

Gegnum grjót og skafl við gengum Baulu á í góðum gír veður grand og færi við fengum fórum niður ansi hýr (Bára að tjá sig á fésbókinni í tindavímu... )

Gegnum grjót og skafl við gengum
Baulu á í góðum gír
veður grand og færi við fengum
fórum niður ansi hýr
(Bára að tjá sig á fésbókinni í tindavímu... )