Ferđ nr. 2. 16. mars, Smáþúfur í Esju. 7,5 km, 2,5 klst. um 600 m hækkun. Upphafspunktur, 38 m y.s. Hæsti punktur, 595 m y.s.

Lagði af stað upp úr 10:00. Kom við á nokkrum stöðum á leiðinni úr bænum. Hiti um 4 °C og lítill vindur, engin úrkoma, léttskýjað.
Lagði bílnum á vigtarplanið við Hvalfjarðargöngin. Ganga hófst um 11:30 og lauk um 14:00. Gangan gekk vel og varð mér frekar heitt á leiðinni upp (enda skein sólin) þannig að ég gekk smá hluta leiðarinnar ber að ofan. Útsýni var gott, sást alla leið að Snæfellsjökli, einstaklega fallegur dagur.

Þegar upp var komið á Smáþúfur ákvað ég að bregða mér niður í Blikdal í stað þess að halda áfram t.d. á Kerhólakamb
eins og ég hafði jafnvel ætlað mér. Gekk niður í dalinn og svo aftur að bílnum.

------

Ísleifur Árnason
Búrfell í Grímsnesi
2. mars 2019
nr. 3:
 

Ferð nr. 3 var farin þann 2. mars á Búrfell í Grímsnesi sem hefur einhvern veginn alltaf orðið útundan hjá mér. Ágætis veður og kom vatnið á toppnum skemmtilega á óvart. Upphafspunktur 49 m. hæð og upp í 540 m. hæð. Hækkun 525 m og var 7,7 km og tók 3 klst.
https://www.wikiloc.com/…/2019-03-02-burfell-grimsnes-33956…

-----

Ísleifur Árnason
 Dragafell við Skorradal
29. mars 2019
nr. 4:

 

Ferð nr. 4 var farin þann 29. mars á Dragafell í Skorradal. Þetta var létt og stutt ganga og má segja að það hafi verið sólskin og hríð til skiptis. Þetta var þó nýtt umhverfi þar sem ég hef lítið gengið þarna. Vegalengd var aðeins um 3,78 km. Upphafshæð var 215 m og mesta hæð 479 m og uppsöfnuð hækkun 343 m. Gangan tók eina klukkustund og 50 mínútur. Læt fylgja mynd af skúr í Skorradal sem ég þekki ekki nafnið á með fellið í baksýn. Lítið útsýni var af topnnum vegna snjókomu og því lítið um myndatökur þar.

-----

Björn Matthíasson
Geitahlíð
8. apríl
Nr. 5:

Þann 8. apríl gekk ég á Geitahlíð við suðurenda Kleifarvatns.
Fékk heilmikið hvassviðri á mig, en gangan var hressandi. Fimmta fjallið af tólf. Sjö eftir.

-----

Ísleifur Árnason
Brennisteinsfjöll
14. apríl
nr. 5:

 

Ferð nr. 5 var farin þann 14. apríl. Brennisteinsfjöll um Grindarskörð. Veðrið var alls ekkert sérstakt, rok, lágskýjað og þoka. Engu að síður var þetta mjög góð ganga, það reyndi mikið á rötun samkvæmt GPS þar sem skyggni var lítið. EInnig gerði vindurinn þetta mun erfiðara en viðvarandi vindur megnið af leiðinni var 15 - 20 m/s.

Ætlunin var að ganga lítinn hrygg frá Grindaskörðum upp á Brennisteinsfjöll, en á hryggnum var öflugur vindstrengur að það var rétt svo hægt að standa þar. Ákvað að þar sem ég væri einn þá væri ekki gáfulegt að halda þeirri leið áfram. Ég fór niður af hryggnum og fór allskyns krókaleiðir á leiðarenda. Set Trackið hérna undir i athugasemd en mæli ekki með að nokkur maður noti það nema kannski til viðmiðunar. Það er klárlega hægt að fara betri leið í meira skyggni og minni vindi. En það verður að segjast að þetta var allt gott í reynslubankann. Það styrkir mikið andlegu hliðina að vera einn í þessum ástæðum þótt að það hafi aldrei nein hætta á ferðum. En mikilvægt að hafa allan búnað í lagi á borð við það að vera með nóg af aukarafhlöðum í GPS tækið.

Helstu lexíur og áminningar voru þær að maður er mjög fljótur að týna áttum í þoku og þarf að kíkja mjög ört á GPS tækið til að ganga í rétta átt. Manni finnst oft eins og maður sé að ganga í rétta átt en áttar sig svo á því að maður er að fara eitthvað kolvitlaust. Önnur lexía er að geyma símann í lokuðum vasa, sem er að sjálfsögðu eitthvað sem alllir eiga að vita en ég afrekaði það að týna honum, en rakti mig aftur samkvæmt GPS og fann hann, góð æfing út af fyrir sig Það útskýrir meðal annars smá tvist á GPS trackinu. Annað tvist er á trackinu þar sem ég stoppaði aðeins í Spenastofuhelli sem er þarna á leiðinni, en það ruglaði aðeins tækið þegar það missti þar sambandið ens og sést á mámarks og lágmarkshæð. Það var annars kærkomin hvíld frá vindunum að kíkja þar í andyrið.

Læt fylgja mynd af "tanngarðinum" í hellinum. Gangan tók 5 klst og 15 mín og var um 15 km (ferðin í hellinn bætti aðeins við vegalengdina - einhver villa) , upphafshæð var 228 m og hámarkshæð 621 m, uppsöfnum hækkun var 765 m enda töluvert um að fara upp og niður á leiðinni.

-----

Davíð Rósenkrans Hauksson
Meðalfell í Kjós
18. apríl
nr. 3:

-----

Ísleifur Árnason
Fagraskógarfjall
1. maí
nr. 6:

Ferð nr. 6 var farin á verkalýðsdaginn þann 1. maí snemma að morgni á Fagraskógarfjall í Hítardal. Mjög skemmtileg ganga um flott fjall og mjög gaman að sjá skriðuna sem féll nýlega úr fjallinu að ofanverðu. Sól var allan tímann en hvasst sérstaklega í byrjun göngu en mjög hlýtt og gott verður þegar ég var á leiðinni niður. Slóðin endar þar sem skriðan féll. Það er óhætt að segja að gangan er krefjandi í byrjun þar sem þar er töluverður bratti og þarf að finna leið milli kletta og skriða. Að öðru leiti er hún frekar létt. Upphafshæð 69 m og mesta hæð 678 m. Uppsöfnuð hækkun 912 m en ég fór góðan hring á toppnum og er þar töluvert um hækkanir og lækkanir. Gangan tók 4 klst og 45 mínútur og var 9,38 km. Læt meðal annars fylgja 2 myndir af skriðunni að ofanverðu.

-----

Davíð Rósenkrans Hauksson
Grímarsfell og Dalsrétt í Kjós
11. maí
nr. 4:

-----

Ísleifur Árnason
Drápuhlíðarfjall
26. maí
(sama dag og á Kerlingarfjall !)
nr. 7:

Ferð nr. 7 var farin þann 26. maí en þó fór ég á Snæfellsnesið og fór í 2 göngur sama daginn. Sú fyrri var Drápuhlíðarfjall sem ég hef alltaf átt eftir. Það var sólríkt allan daginn en frekar kalt í lofti og hvasst á Snæfellsnesinu. Vegalengdin var 6,66 km eins vel og það hljómar. Lægsti punktur var 32 m og hæsti 531 m og uppsöfnuð hækkun 547 m. Gangan tók 3 klst og 8 mín.

-----

Ísleifur Árnason
Kerlingarfjall á Vatnaleið
26. maí
(sama dag og á Drápuhlíðarfjall !)
nr. 8:

Ferð nr. 8 var einnig farin þann 26. maí. Ég fór á Kerlingarfjall sem er nálægt Vatnaleiðinni. Ég byrjaði gönguna í Kerllingarskarði á milli Grímsfjalls og Hafrafells en ég fór á þau bæði fyrir einhverju síðan. Ég gat ekki fundið neitt um göngur á Kerlingarfjall , það væri gaman að heyra ef einhver hefur heyrt um göngur á fjallið eða heyrt um þær. Það er ekki auðvelt að finna leið upp á fjallið og ákvað ég að prófa að fara upp á suðvesturhliðinni. Þar voru klettar sem mér sýndist vera leið hjá en komst svo að því að svo var ekki, allavega ekki vit í því einn á ferð, þannig að ég fór vestar og fann örugga leið með því að fara vestur fyrir þá. En játaði mig svo sigraðan í 547 m hæð þar sem allar leiðir þar allavega virtust ófærar, en fjallið er 585 m hátt. Mig grunar að það gæti verið ágætist leið að suðaustanmegin og verður það reynt síðar. Upphafshæð var 281 og hámarkshæð 547, uppsöfnuð hækkun var 312 m og tók gangan 2 klst og var 3,63 km. Set trackið í komment en þar sést ef zoomað er inn flækingurinn á mér þegar ég var að reyna að finna leið. Set 2 myndir hér að neðan, sú fyrri þar sem horft er yfir Hafrafell úr hlíðinni og sú seinni sem er tekin í gegnum náttúrulegan ramma sem var þarna á leiðinni.

-----

Jóhanna Fríða Dalkvist
Þyrill
9. júní
Nr. 1:

Þó ég sé alin upp í sveit, þá er þetta í fyrsta skipti sem ég sé dauðan nautgrip uppi á fjalli.

Jæja loksins farinn að poppa inn tími til að gera eitthvað af viti.
Ótrúlegt en satt, þá hafði ég ekki farið á Þyril áður og ákvað því að slá tvær flugur í einu höggi
og byrja í tveimur áskorunum í sömu ferðinni, á sama fjallinu.
Ferð nr. 1 - Þyrill í Hvalfirði á Hvítasunnudag, 9. júní 2019.
Veðrið var dásamlegt þó hafi aðeins blásið á leiðinni upp, en það fór aldrei yfir 10 m/s. Þar sem ég lagði ekki af stað gangandi fyrr en vel yfir kl. 11 og þá liðnir næstum þrír tímar frá morgunmat, þá stoppaði ég fljótlega í skjólsælli laut og maulaði hádegismatinn. Uppi blés aðeins en allt þurrt og greinileg leið alla leiðina, svo það var aldrei spurning um að rata eða ekki rata. Á toppnum var farið að lægja og svo var komið logn á leiðinni niður. Sólin skein nánast allan tímann, enda stoppaði ég mikið, eða heilan klukkutíma í heildina, þar af um hálftíma á toppnum og var 2,5 klst á göngu. Lengdin varð 8,5 km með 460 m hækkun miðað við 29 m byrjunarhæð.
Rétt áður en komið er á toppinn, liggur dauð kvíga við gönguleiðina, en hún hefur greinilega legið þarna allavega hluta vetrar. Ég hringdi í bóndann og lét vita þegar ég kom heim og hann hafði þá frétt af henni, en ekki stendur til að fjarlægja hana. Ég stakk þó upp á því að reynt yrði að draga hana eitthvað í hvarf, þar sem hún gæti farið að lykta fljótlega.
8,5 km og 460 m hækkun á 3:36 klst, byrjunarhæð 29 m og mesta hæð 397m

-----

Davíð Rósenkrans Hauksson
Þakgil upp á Miðafrétt
28. júní
nr. 5:

Ferð nr. 5. Frá Þakgili upp á Miðafrétt.
Mér var falið það hlutverk að velja gönguleið og leiðsegja vinnufélögum og fjölskyldum þeirra í útilegu í Þakgili. Ég hafði gist þarna áður yfir helgi fyrir 3 árum og vissi því af ágætis gönguleið. Þegar í Þakgil var svo komið 28. júní 2019 reyndist sú gönguleið bæði lengri og erfiðari en mig hafði munað. Það gerist örsjaldan 😊 Eftir að hafa ráðfært mig við tjaldsvæðisvörð ákváðum við í sameiningu að betra væri að fara auðveldari leið sem liggur eftir jeppaslóða. Hún er gengin fram og tilbaka og því í raun hægt að snúa við hvenær sem er og að því leytinu til hentug, sérstaklega fyrir lítil börn. Sem ábyrgðarfullur leiðsögumaður varð ég að skoða þessa leið áður en ég leiddi fólk þar um svo ég myndi ekki leiða það í ógöngur. Ég arkaði því af stað upp og niður jeppaslóðann og lengra en ég fór með sjálfan hópinn daginn eftir. Á leiðinni upp hugsaði ég með mér að þessi ganga væri að sjálfsögðu gjaldgeng í þessa áskorun. Ég strunsaði þetta upp í gallabuxum og stuttermabol með peysu og jakka vafið um hendurnar og hljóp við fót á leiðinni niður. Alls voru þetta um 9 km á 90 mínútum með um 450 m hækkun. Upphafspunktur var 144 mys. og hæsti punktur var 582 mys. Ég gekk frá ca. 23:00 til 00:30. Gott veður, frekar heiðskýrt og einstaklega fallegt umhverfi.

-----

-----

Jóhanna Fríða Dalkvist
Löngubrekkur og Þjóðhátíðarlundur 10. júní
Nr. 2:

Ferð nr. 2 - Annan í Hvítasunnu, 10. júní 2019
Þegar ég gekk Búrfellsgjá aðeins áður, sá ég skilti sem vísaði á Löngubrekkur og Þjóðhátíðarlund og ákvað ég að skella mér þá leið í sól og blíðu og skokkaði og gekk til skiptis. Fannst gaman að sjá hversu vel er búið að merkja göngu-, hjóla- og skíðaleiðir í Heiðmörkinni, neyðarpunktar víða og víða hægt að setjast niður við borð.
Þetta varð í það heila 7,41 km og 116 m hækkun á 01:48 klst, en ég lenti á langri kjaftatörn við sjötugan fjallagarp og konuna hans.
Byrjunarhæð 77 m og mesta hæð 101 m.

-----

Jóhanna Fríða Dalkvist
Hafravatnshringur
16. júní
Nr. 3:

Ferð nr. 3 - 16. júní - Hafravatnshringur.
Ótrúlegt en satt hafði ég aldrei gengið þennan hring, lengi búin að ætla mér það en ekki haft mig í það. Ég hafði misstigið mig fáeinum dögum fyrr og því var fjallganga ekki í boði. Til að nýta blíðuna datt mér þetta í hug og þetta var skemmtiilegt. Ég varð forvitin að vita eitthvað um húsið sem stendur við Hamarinn við enda vatnsins og fékk að vita hluta sögu þess eftir krókaleiðum, segi ykkur frá því síðar í göngu ;)
5,42 km og 46 m hækkun á 01:41 klst, enda pínu skökk og skæld eftir misstig og veðrið var til að njóta :)
Byrjunarhæð 185 m, mesta hæð 191 m.

-----

Jóhanna Fríða Dalkvist
Hulduhóll, Torfdalshryggur, Hjálmur og Nessel
24. júní
Nr. 4:

Ferð nr. 4 - 24. júní 2019 - Hulduhóll, Torfdalshryggur, Hjálmur og Nessel.
Í fjarveru Toppfara-þjálfara bauðst ég til að sjá um tvær göngur. Mér datt í hug að reyna að finna eitthvað sem hafði ekki verið farið áður, en svona nálægt höfuðborgarsvæðinu getur það verið ansi snúið. Ég fór í kortaforritið mitt og fór að leita og vona að ég hafi fundið leið sem hafi ekki verið farin áður, þó Hjálmur hafi verið genginn áður. Ég fór því að sjálfsögðu í undirbúningsgöngu, en var búin að teikna ca slóð fyrirfram. Ég fékk frábært útsýni og gott veður, sem gerði þessa leið afar skemmtilega.
10,1 km og 415 m hækkun á 03:22 klst, byrjunarhæð 194 m og mesta hæð 462 m.

-----

Jóhanna Fríða Dalkvist
Kerlingarfjöll að Kerlingu
29. júní
Nr. 5:

Ferð nr. 5 - 29. júní 2019 - Kerlingarfjöll í átt að Kerlingu.
Ég hafði verið beðin af vinahóp að leiðsegja þeim í Kerlingarfjöllum, svo ég fór í könnunarleiðangur, var búin að skoða kort og athuga með leiðir. Ég ætlaði að byrja á að ganga frá tjaldstæðinu að Hveradölum, en fyrsta skiltið sem ég kom að, vísaði meðal annars að Kerlingu, en þá gönguleið hafði ég hvergi séð. Auðvitað þurfti ég að fara að tékka á þessu... ég meina hver fer í Kerlingarfjöll og fer ekki að sjálfri Kerlingunni. Það var alveg ný reynsla fyrir mig að leita að Kerlingu en ég er meira vön því að leita að körlum... eða þannig.
Leiðin er stikuð, en þó þurfti ég nokkrum sinnum að staldra við til að koma auga á þá næstu, því þeim er ekki vel við haldið.
Skiltið sagði 7,8 km að Kerlingu, en þegar ég var búin að ganga um 9 km samkvæmt GPS, þá ákvað ég að snúa við, svo ég fann enga Kerlingu (ekkert frekar en neinn karl 🙈). Þegar ég kom heim og komst í tölvu og sá hvar hún var, þá komst ég að því að ég átti eftir um 400 metra að henni og eitthvað slatta minna til að koma auga á hana.
Ég er hins vegar búin að teikna leið sem mig langar að fara næst þegar ég fer að finna hana.
Fékk milt og gott veður, sólarlaust og nánast engan vind. Ég var alein í heiminum, óð eina á, rakst á um fimmtán hjörtu (sem ég deildi á vegginn minn), heyrði hvorki né sá fólk eða bíla, en eitt lóupar fylgdi mér stóran hluta leiðarinnar,
dásamlegt að vera einn dag "out of nowhere" í algjörum friði.
18,6 km og 809 m hækkun á 06:38 klst, byrjunarhæð 711 m og mesta hæð 930 m.

-----

Ísleifur Árnason
Þverfell við Reyðarvatn
10. júní
nr. 9:

Ferð nr. 9 var farin þann 10. júní á Þverfell við Reyðarvatn. Skemmtileg ganga og að mestu gott og sólríkt veður, það sem var virkilega áberandi var hvað mýið var mikið við vatnið. Það var mikið fagnaðarefni að komast upp í smá hæð þar sem það var sma gola og það minnkaði. Ég hef líklega borðað um 50 flugur í göngunni sem var nú ekki ætlunin. Gangan var 10,96 km , upphafshæð var 314 m og mesta hæð 656 m. Uppsöfnuð hækkun var 636 m og tók gangan 3 klst og 20 mínútur. Læt fylgja mynd sem ég tók á leiðinni upp þegar mýið hafði minnkað töluvert, það sést þó töluvert á myndinni (svörtu flekkirnir), við vatnið var yfirleitt ekki hægt að munda myndavélina vegna mýsins, ég veit að selfies eru ekki æskilegar hér en læt eina fylgja af mér með flugunum, svipurinn segir ýmislegt um hvað mér fannst um þetta allt saman.

-----

Ísleifur Árnason
Kýpur Cyclops hellarnir
23. júní
nr. 10:

Ferð nr. 10 var farin þann 23. júní og er frekar óvenjuleg en hún var farin á Kýpur. Það er svona á mörkunum að það sé hægt að telja þetta sem fjallgöngu en þetta var það sem komst næst því sem ég fann á þessu svæði sem ég var á . Um var að ræða ganga meðfram strandleggju og upp á lítið útsýnisfell í þjóðgarði sem heitir Cavo Greco National Forest Park, skógurinn er þó ekki mikill á svæðinu sem er þó mjög fallegt á sinn hátt. Gangan hófst hjá honum svokölluðu Cyclops hellum sem eru nálægt Konnos Beach (ég veit að fáir átta sig á örnefnunum en læt þau fylgja. Mikið var stoppað og slórað í göngunni þar sem margt var að skoða. Ég lagði af stað um kl. 08 um morguninn , ég var ekki klár á því þegar ég fór af stað hvort það væri góð gönguleið þarna með ströndinni að útsýnisfellinu en þarna voru ágætir stígar, í þessu tilfelli hélt ég mig aðallega á þeim þar sem ég var í opnum skóm. Ég byrjaði að skoða Cyclops hellana sem eru mjög fallegir, fljótlega kom ég svo að lítilli kirkju en við hana voru nokkrir ferðamenn en hún reyndist heita Agioi Anargyri Church, sá þar skilti sem benti á aðra hella niður við sjóinn, ég skoðaði þar flottann helli en þar voru nokkrir ferðamenn ásamt köfurum sem reyndust svo vera nokkuð algeng sjón á leiðinni. Stuttu síðar kom ég að "blue Lagoon" þeirra Kýpverja en um er að ræða sundstað í sjónum sem þekktur er fyrir að vera mjög tær, einnig eru þar sillur sem hægt er að ganga meðfram sjónum, mjög sérstakt. Ég kðaði einnig á leiðinni náttúrulega steinbrú sem ég var búinn að heyra af en vissi ekki að væri þarna á leiðinni og var því gaman að ramba á hana. Fljótlega kom ég svo að helstu hækkuninni (sem var ekki mikil). Ég fann ekkert annað nafn á fellinu en Cavo Greco Viewpoint. Þar fór ég upp og niður aftur og svo hélt niður á þjóðveg og tók rútu að hótelinu. Upphafshæð var 19 m og hæsti punktur á útsýnisfellinu var 86 m :) og hækkun á leiðinni 125 m. Ég var þó með Wikiloc appið í símanum þar sem ég var ekki með GPS tækið með og hafa hæðartölurnar þar verið einkennilegar, gangan var 10,8 km og tók 3 klst og 48 mínútur, enda mikið slórað og skoðað. Þótt hækkunin var mjög lítið þá voru þarna alveg nýjar áskoranir og þá helst hitinn, ég reyndi að fara snemma þegar hitinn var aðeins minni en þar sem það var hitabylgja á svæðinu þá var hann um 30 C þegar ég fór af stað og kominn í 36 C þegar klukkan var að nálgast hádegi. Lítið sem ekkert var um skugga á svæðinu þar sem sólin þarna er nánast beint fyrir ofan mann yfir hádaginn. Það vakti athygli hversu erfiðara það er að verjast hitanum heldur en kulda. EInnig voru allskyns kvikindi þarna sem maður er ekki vanur að sjá hér og voru helstu ferðafélagarnir eðlur sem hlupu reglulega fyrir framan mig og með mér. Þarna var mjög fallegt en náttúran er mjög einsleit en aðallega er um að ræða ljóst hraun / grjót og kjarr. Það er fátt sem jafnast á við íslenska náttúru og saknaði ég mikið svalans hér þegar hitinn var sem mestur.

-----

Jóhanna Fríða Dalkvist
Hveradalir Kerlingarfjöllum
30. júní
Nr. 6:

Ferð nr. 6 - 30. júní - Hveradalir frá tjaldstæðinu í Kerlingarfjöllum.
Mig langaði að finna mátulega langan og mátulega erfiðan hring fyrir vinahópinn sem ég var búin að taka að mér að leiðsegja og það er algjört "möst" að sjá Hveradali þegar maður er í Kerlingarfjöllum. Ég var búin að sjá leiðina á korti utan á einu húsanna í Kerlingarfjöllum og búin að lesa mig aðeins til. Það var glampandi sól, en ekki nema um 6°C í forsælu svo ég lagði af stað í lopapeysu, þar sem ég reiknaði með að lognið á tjaldstæðinu myndi ekki duga lengi. Þegar ég var komin upp á hæðina í suður frá tjaldstæðinu, var ennþá logn, svo ég var fljót að fara úr lopapeysunni og var á stuttermabolnum alveg að Hveradölum sjálfum, en þá fór að blása köldum norðanvindi. Ég var þó úr og í lopapeysunni eftir það, þar til ég gekk slóðann austan megin Hveradala, en þá voru komnir um 13-14 m/s og hitinn með vindkælingu kominn niður í 3,5°C (gaman að eiga græjur sem mæla þetta 😉)
Ég tók smá króka í Hveradölum sjálfum og svo að upphafsstað göngu upp á Fannborg og Snækoll. Mjög flott gljúfur meðfram jeppaslóðanum.
Í heildina varð þetta 13,5 km og 668 m hækkun á 04:30 klst, byrjunarhæð 711 og mesta hæð 1062 m.

-----

Jóhanna Fríða Dalkvist
Brúarárskörð að upptökum og áleiðis á Högnhöfða
6. júlí
Nr. 7:

Ferð nr. 7 - 6. júlí 2019 - Brúarárskörð að upptökunum og áleiðis upp á Högnhöfða.
Ég hef áður gengið á Högnhöfða um Brúarárskörð, en þessa ferð fór ég til að finna góða leið að upptökum Brúarár og hugsanlega þaðan upp á Högnhöfða, því leyfi ég mér að setja þetta hér inn sem ókunna slóð.
Þessa ferð fór ég líka sem undirbúningsgöngu fyrir vinahópinn sem ég var búin að taka að mér að leiðsegja, en þetta var plan B, ef Kerlingarfjöll myndu ekki ganga upp.
Þetta var heitasti dagur sumarsins, altént heitasti dagurinn sem ég var að ganga. Ekki bætti úr skák að tveimur dögum áður gaf ég blóð í Blóðbankanum og daginn fyrir göngu, þegar ég hefði átt að vera að passa upp á vatnsbirgðirnar eftir blóðgjöfina, þá var ég að rúnta með pabba sem varð 75 ára þann dag. Það var svo gaman að ég gleymdi öllu öðru, m.a. að drekka vatn og það fékk ég all rækilega í bakið þennan dag.
Ég varð strax þreytt í fyrstu brekkunni, enda brekkan brött og mjög heitt og ég fljót að skella skuldinni á það, hélt áfram í þeirri vissu að þetta myndi lagast. Þegar ég kom upp þessa brekku, sem tók dágóðan tíma, var ég komin með þreytuverki í alla vöðva líkamans, í lærin, kálfana, axlir og upphandleggi, en það myndi nú aldeilis lagast þarna á jafnsléttu og svo niður í móti að Brúarárskörðum. Þar settist ég niður og fékk mér harðfisk og smjör og nóg að drekka. Allt kom fyrir ekki, ég var ennþá þreytt, en ennþá var ég ákveðin í að þetta myndi lagast, þó mér satt að segja óaði við þessari litlu brekku upp frá skörðunum, sem allt í einu var brött og löng. Ég hélt áfram, upp þessa brekku, niður aftur, upp að Strokki (lagði alls ekki í að fara upp á hann, vá hvað það var bratt og hátt og langt!!!), niður aftur, upp aftur, niður og upp, vitandi það að ég átti eftir að ganga þetta allt til baka. Þar sem þetta var könnunarleiðangur, þá bara varð ég að duga en ekki drepast.
Þegar ég var komin að brúninni niður að upptökunum, blasti við mér þessi illilegi steinn sem sagði við mig "snúðu við kerling, þú hefur ekkert hingað niður að gera, þú ert búin að finna góða leið, þú sérð upptökin héðan, farðu heim að hvíla þig"... og ég gengdi, horfandi á þessa löngu, bröttu brekku (not) og ég sneri við.
Þegar ég var aftur komin að Strokki, datt mér í hug að mjaka mér þar upp í átt að Högnhöfða og sjá hvort það væri ekki þægileg leið, sem hún og var, þó hún væri í alvörunni svolítið brött, en ég var ein, nægur tími og ég bara stoppaði þegar ég þurfti, ekkert stress og engin pressa. Þar fyrir ofan kom ég að mjög skemmtilegri myndun í móberginu sem ég hafði ekki séð áður og er algjörlega þess virði að skoða. Ég fór svo aðeins niður í skarðið hinu megin (í staðinn fyrir að fara áfram upp Högnhöfða) en bjó mér samt þannig til enn eina brekkuna til að fara upp. Það var nefnilega bara allt í lagi, því þrátt fyrir allt þetta, þá var ég að njóta göngunnar, þó það hljómi skringilega, mér fannst gaman og mér fannst dásamlegt að horfa í kringum mig, enda einmuna veðurblíða og ég á brjóstahaldaranum næstum allan tímann sökum hita og enginn annar á þessu svæði. Líklega er það því að þakka að það er búið að læsa hliðinu upp þennan veg og maður þarf að borga fyrir að fara hann. Fyrst var ég frekar skúffuð yfir því, en svo fattaði ég hvað það væri dásamlegt að hafa þetta svæði ekki allt morandi í alls konar bílum, því það er ekkert grín að mæta bíl á þessum vegi, allavega gott að það þarf að biðja um leyfi, þó það megi deila um gjaldtökuna.
Frábær ferð þrátt fyrir allt og hópurinn sem ég var að undirbúa mig fyrir, endaði svo á því að velja Högnhöfða.
Heildin varð 9,41 km með 745 m hækkun á 04:23 klst, byrjunarhæð 240 m og mesta hæð 602 m.

-----

-----

Ásta Henriksdóttir
Þyrill
18. júlí
Nr. 1:

 

Hálfnað verk þá hafið er, ekki satt? Skráði mig í þessa áskorun sem virtist sakleysisleg svona miðað við áskorun ársins 2018 en hafði mig ekki af stað, fyrr en nú. Tilgangur þessarar fyrstu ferðar var tvíþættur, annars vegar að kanna hvort ég kæmist upp örlítið fjall og hins vegar að taka myndir án þess að hafa stillt á AUTO. Ég komst upp fjallið og tók slatta af myndum, flestar þeirra liggjandi á maganum úti í mýri þannig að tenging við náttúruna var mjög góð :) Myndirnar eru nú margar annað hvort of ljósar eða of dökkar eða hreyfðar vegna mikils vinds en það skiptir ekki máli því ég lauk fyrstu göngu af 12 í þessari áskorun svo nú er ekki aftur snúið og þá er bara að læra af mistökunum í næstu ferð :)　
Gleymdi mér svo í dýrðinni á bakaleiðinni, þvílíkt fífuhaf ofan á fjallinu og fífurnar voru svo fallega samstíga í rokinu. Fór svo framhjá stígnum niður og var allt í einu stödd á milli tveggja klettabelta. Hélt að það væri ekki hægt að villast á þessari leið :) Þetta lengdi leiðina svolítið og gerði hana meira a la Toppfarar en Endomondo hefur eitthvað svikið mig eða misst samband og sýnir bara að hluta bein strik og ekki rétta vegalengd eða tíma eða hækkun. Vonandi sleppur þetta samt með myndunum.　

Davíð Rósenkrans Hauksson
Drageyraröxl og Mórauðihnúkur Skorradal
10. ágúst
nr. 7:

Ferđ nr. 7. 10. ágúst. Drageyraröxl og Mórauðihnúkur í Skorradal.
Skrapp heim á Hvanneyri um helgina og ákvað að koma við á einhverju fjalli. Það var nokkuð vindasamt og skýjað á leiðinni svo ég hugsaði með mér að ég myndi ekki fara í neitt sérstaklega langa göngu. Ég stoppaði nokkrum sinnum á leiðinni og leit á fjöllin. Ákvað síðan að fara Draghálsleiðina í gegnum Svínadal úr Hvalfirði og grunaði að á vegi mínum yrði spennandi fjall. Ég leit aðeins í kringum mig í Svínadal en fann að mig langaði að fara yfir í Borgarfjörð og ganga þar. Þegar ég svo kem upp á Draghálsinn fer ég að hugsa um að ganga upp á Skorradalsháls en fannst hann einhvern ekki alveg nógu hár. Ég lít þá í hina áttina og sé Drageyraröxl og Mórauðahnúk rétt sjást úr skýjunum og ákvað því að ég skyldi ganga þar upp. Ég legg bílnum við Selskóg nálægt Litlu-Drageyri og legg í hann í gegnum kjarr og meðfram læk. Brátt fer brattinn að aukast og svitinn að spretta fram. Ég kem svo á efsta punkt sem líklega heitir Mórauðihnúkur í um 800 m hæð yfir sjávarmáli. Á leiðinni upp var ég farinn að gæla við að gera úr þessu hringleið þar sem það virtist nokkuð auðsótt. Ég hafði því augun á fjallshlíðinni hægra megin við mig á leiðinni upp en þar var að sjá hamrabelti sem virtist vera hægt að fikra sig niður um. Ég kastaði mæðinni á toppnum og snæddi nesti. Hélt svo áfram hringleiðinni og niður hamrabeltið. Niðurleiðin og hamrabeltið var hins vegar aðeins brattara og erfiðara viðureignar en mér hafði sýnst. Ég var kominn langleiðina niður þegar mér leist ekki lengur á blikuna og sneri því við upp og fann aðra betri leið niður. Mikið var um ber á leiðinni upp sem og niður, bæði kræki- og bláber og tíndi ég berin bæði beint ofan í mig sem og í poka.

-----

Jóhanna Fríða Dalkvist
Eldborgarhraun og Lambafellsklofi
10. ágúst
nr. 15:

-----

Jóhanna Fríða Dalkvist
Kringum Högnhöfða um Brúarárskörð ofl
1. september
nr. 16:

Ókunnar slóðir nr. 3, 9. september. Ekki langt frá Kleifarvatni er Fagridalur. Hef lengi ætlað að rölta þangað því ég var forvitin að sjá hvers vegna dalur á þessum hrjóstrugu slóðum heitir Fagridalur, hvað það er við hann sem er svona fagurt. Komst að því að dalurinn ber nafn með rentu. Þegar ég nálgaðist hann opnaðist fagurfrænn gróðurfaðmurinn sem einhvern veginn var á skjön við landslagið all í kring. Ætlaði aðeins að ganga inn í botn dalsins en stóðst svo ekki þá freistingu að brölta upp úr honum. Fann stikaða leið upp úr dalnum og sýnist mér þessi leið vera hluti af Dalaleið. Þetta voru 9,11 km á 3:37 klst, mesta hæð 460 m og hækkun 250 m. Lægsti punktur 219 m.

-----

Davíð Rósenkrans Hauksson
Stapatindar Sveifluhálsi
13. september
nr. 8:

-----

Björn Matthíasson
Vatnshlíðarhorn Reykjanesi
15. september
Nr. 6:

Sjötta gangan mín var á Vatnshlíðarhorn, fjallsbrúnina vinstra megin við Kleifarvatnsveg þegar ekið er frá vestri til austurs.
Frekar auðveld ganga, en í miklum stormi.

-----

Davíð Rósenkrans Hauksson
Húsmúli Hellisheiði
23. september
nr. 9:

 

Ferð nr. 9. Mánudagur 23. september. Húsmúli á Hellisheiði.
1,5 klst, 6 km, 350 m hækkun. Lægsti punktur: 300 m. Hæsti punktur: 615 m.
Ákvað að skella mér á fjall eftir vinnu ekki síst þar sem ég hef verið einum mánuði á eftir áætlun frá byrjun í þessari áskorun. Ég leit á kort á ja.is um daginn og eftir smá skoðun ákvað ég að ganga á Húsmúla í Henglinum. Það leit út fyrir einhverja rigningu skv. veðurspá en mér sýndist hún eiga að minnka eitthvað um kl. 18:00. Ég lagði því af stað eftir vinnu og keyrði í smá rigningu og pínu þoku inn á afleggjarann hjá Hellisheiðarvirkjun og inn á bílastæðið við Sleggjubeinsdal. Rigning var enn þá og ég vonaðist til að henni slotaði þegar ég væri lagður af stað. Klæddi mig því í regnfötin og arkaði af stað. Ég gekk hringleið, fór upp vestan megin og fylgdi stikaðri slóð sem líklega liggur yfir á Nesjavelli. Fór af henni og upp á topp Húsmúla. Það rigndi stöðugt allan tímann og kólnaði ég nokkuð á toppnum og ákvað að staldra ekki lengi þar við enda komin svolítið þoka. Sneri því niður og fylgdi Sleggjubeinsskarðinu niður á bílastæði. Kom nokkuð blautur og kaldur enda rigndi allan tímann. Tók bara eina mynd þar sem ég vildi vera að taka upp símann í óþarfa.

-----

Björn Matthíasson
Hestfjall Suðurlandi
30. september
Nr. 7:

Sjöunda gangan mín var á Hestfjall, þ. 30. september. Þetta var í þriðja skipti sem ég reyndi við þetta fjall. Fyrst með Siggu og Heimi fyrir nokkrum árum, en þá fundum við ekki uppgöngustaðinn. Annað skipti í janúar sl., en þá sneri ég við vegna snjóþyngsla eftir að hafa gengið mestalla leiðina upp vestan megin frá. Þriðja og síðasta tilraunin heppnaðist. Þá gekk ég frá bænum Vatnsnesi, ók þar inn á tún og vestan megin við fjallið þar til ég kom að gamalli sandnámu með aflagðri skurðgröfu og hóf þar gönguna.
Fjallið er ekki hátt, 317 metrar. Brekkan mest gróin grasi og mosa. Talsvert um ber.
Mjög gott útsýnisfjall. Sést yfir allan fjallahringinn frá Eyjafjallajökli, Heklu, til fjalla vestan Kjalar, til Högnhöfða og allra fjalla til Ingólfsfjalls. Útsýnið gerist vart betra.

-----

Björn Matthíasson
Laugafell við Geysi og Miðfell við Flúðir
21. september
Nr. 8 og 9:

Fjöll nr. 8 og 9 voru gengin á sama deginum, Laugafell við Geysi og Miðfell við Flúðir 21. september.
Hvorutveggja lágreist fjöll en sérstæð á sinn hátt.
Laugafellið er hæðin beint fyrir ofan Geysi. Margir ferðalangar ganga á þetta fell.
Það er eins og að vera á mauraþúfu, svo fjölmennt var á fjallinu, og ég eini Íslendingurinn.

Miðfellið var önnur saga.
Þar gekk ég einn upp á grasi gróið fjallið, með fallegt fjall nálægt tindinum.
Merkilegt hvað fjöll á Suðurlandi eru gjarna með vatn nálægt tindinum, t.d. Vörðufellið og Búrfell í Grímsnesi. Og vötnin eru veiðivötn.

-----

Björn Matthíasson
Hagafjall
6. október
Nr. 10:

Tíunda fjallið mitt var Hagafjall 6. október, notalegt fjall beint fyrir ofan Gaukshöfða. Grasi grónar brekkur alla leið upp.
Lagt af stað frá býlinu Haga, gengið framhjá hlöðu og gripahúsi, klöngrast yfir rafmagnsgirðingu og þaðan beint upp.
472 metrar á um 1,5 klst.

-----

Davíð Rósenkrans Hauksson
Eyrarfjall í Kjós
19. október
nr. 10:

Samantekt frá upphafi:

Ísleifur Árnason búinn með 12 af 12:
Lokið !
Bæjarfell og Arnarfell Krýsuvík í janúar
Fagradalsfjall og Borgarfjall Reykjanesi í janúar
Búrfell Grímsnesi í mars
Dragafell við Skorradal í mars
Brennisteinsfjöll við Grindaskörð í apríl
Fagraskógarfjall 1. maí
Drápuhlíðarfjall 26. maí
Kerlingarfjall 26. maí
Þverfell við Reyðarvatn 10. júní
Kýpur Cyclops hellarnir 23. júní
Suðurnámur 15. júlí
Lambatindur Árneshreppi 3. ágúst.

Jóhanna Fríða Dalkvist búin með 12 + 4 = 16:
Lokið !
Þyrill 9. júní
Löngubrekkur og Þjóðhátíðarlundur 10. júní
Hafravatnshringur 16. júní
Hulduhóll, Torfdalshryggur, Hjálmur og Nessel 24. júní
Kerlingarfjöll að Kerlingu 29. júní
Hveradalir Kerlingarfjöllum 30. júní
Brúarárskörð að upptökum og áleiðis á Högnhöfða 6. júlí
Skarðshyrna og Heiðarhorn 8. júlí
Syðri Ófæra og Silfurfoss 3. ágúst
Eldgjá og Ófærufoss 3. ágúst
Álftavötn 4. ágúst
Laki Gestagatan 5. ágúst
Laki Tjarnargígur, Eldborgarfarvegur og Stóri gígur 5. ágúst
Gjátindur 7. ágúst
Eldborgarhraun og Lambafellsklofi 10. ágúst
Kringum Högnhöfða um Brúarárskörð ofl. 1. september

Davíð Rósenkrans Hauksson búinn með 11 af 12:
Búrfell Grímsnesi í febrúar
Smáþúfur Blikdal í mars
Meðalfell í apríl
Grímarsfell og Dalsrétt í Kjós 11. maí
Eldborg, Drottning, Stóra Kóngsfell 8. júlí
Þakgil upp á Miðafrétt 28. júní
Drageyraröxl og Mórauðihnúkur Skorradal 10. ágúst
Stapatindur Sveifluhálsi 13. september
Húsmúli Hellisheiði 23. september
Eyrarfjall í Kjós 19. október
Innri og Ytri Svartitindur og Rauðuhnúkafjall 2. nóvember

Björn Matthíasson búinn með 10 af 12:
Stóra og Litla Lambafell, Bæjarfell og Arnarfell Reykjanesi
Geitahlíð Reykjanesi 8. apríl
Vatnshlíðarhorn Reykjanesi 15. september
Hestfjall Suðurlandi 30. september
Laugafell við Geysi og Miðfell við Flúðir 21. september
Hagafell Suðurlandi 6. október

Ásta Henriksdóttir búin með 4 af 12:
Þyrill 18. júlí
Háibjalli og Snorrastaðatjarnir 25. júlí
Fagridalur 9. september
Fjallahringur Arnarvatns Sveifluhálsi 4. desember

Anna Jóhanna hætti við:
Fragafell ofan Seljalandsfoss í mars
Hætti í áskoruninni